کویت کې د شیعه ګانو پر جومات ځانمرګي برید "۲۵ کسان وژلي"

Image caption دغه برید د جمعې لمانځه مهال د کویت ښار ختیځ د الصوابر په نامه بوختې سیمې کې د امام صادق جومات کې شوی دی.

د کویت د کورنیو چارو وزارت وايي د دغه هېواد پلازمېنه کې د شیعه ګانو پر یوه جومات ځانمرګي برید پایله کې لږترلږه ۲۵ کسان وژل شوي دي.

دغه وزارت ویلي برید کې ۲۰۲ کسان ټپیان دي. پر انلاین خپاره شوي انځورونه د جومات پر ویجاړ شوي چت پراته مړي ښيي.

دغه برید د جمعې لمانځه مهال د کویت ښار ختیځ د الصوابر په نامه بوختې سیمې کې د امام صادق جومات کې شوی دی.

له اسلامي دولت ډلې سره تړلې یوې ډلې د برید مسولیت منلی. اسلامي دولت ډلې په وروستیو کې په ګاونډیو هېوادونو سعودي او یمن کې ورته بریدونه کړي دي.

خو دا په کویت کې د شیعه ګانو پر جومات لومړی برید دی.

د رویټرز خبري اژانس راپور ورکوي د کویت د پارلمان یوه غړي خلیل الصالح چې د برید عیني شاهد دی وویل جومات کې شاوخوا ۲۰۰۰ کسان موجود وو چې درنه چاودنه وشوه.

"د ځانمرګي له ظاهره څرګنده وه چې ځوان هلک دی. هغه د سجدې پر مهال جومات ته ننوت او ماته شاوخوا ۲۰ کلن ښکارېده. ما په خپلو سترګو ولید."

د کویت لومړي وزیر شیخ جابر المبارک الصباح وویل دغه برید د ملي یووالي ګواښولو په موخه شوی. نوموړي زیاته کړه: "خو دا کار اسانه نه دی او موږ له هغوی ډېر پیاوړي یو."

حکومتي تلویزونونو ښودله چې ښاغلی الصباح د پېښې سیمې ته ورغلی و.

له اسلامي دولت ډلې سره تړلې یوه ډله چې ځانونه د نجد ولایت بولي، هماغه ډله چې په وروستیو اوونیو کې یې په سعودي کې د شیعه ګانو پر جوماتونو د بریدونو مسولیت منلی و، وویل نننی برید دوی کړی دی.

پر انلاین خپرې شوې ویډیوګانې چې په ظاهره د برید له سیمې دي داسې سړي ښيي چې د ځینو کالي پر وینو لړلي او له لوګي ډکې خونې کې ګرځي.

کویت، چې سنیان په کې واکمن دي، شیعه لږه کي هم لري چې د اسلامي دولت ډله یې کافران بولي.