"اسلامي دولت ډلې پر اسرایلو توغندیز برید کړی"

Image caption غزې سره پر پوله د اسرایلو په اشکول سیمه کې د خطر زنګونه هم اورېدل شوي دي.

د سینا ولایت په نامه ډلې چې د اسلامي دولت اورپکې ډلې سره تړلې ویلي دوی د مصر له سینا سیمې د اسرایلو پر خاوره درې توغندي توغولي دي.

دغې ډلې وویل برید یې د مصر له پوځ سره د اسرایلو د همکارۍ په غبرګون کې ترسره کړی دی.

اسرایلي چارواکي وايي دوه توغندي یې د خاورې په سوېلي برخه کې لګېدلي خو ځاني یا مالي زیان یې نه دی اړولی.

له چارشنبې ورځې راهیسې د سینا په شمال کې د جګړې له کبله لږترلږه ۱۷ مصري پوځیان او د اسلامي دولت ډلې ۱۰۰ اورپکي وژل شوي دي.

نښتې د شیخ زوید پر ښارګوټي د اسلامي دولت ډلې اورپکو له یوه ستر برید وروسته پیل شوې.

د خطر زنګ

د سینا ولایت په نامه ډلې د جمعې پر ورځ په ټولنیزو رسنیو کې ادعا وکړه چې پر اسرایلو یې توغنديز برید کړی دی.

دغې ډلې وویل دوی "د فلسطین پر اشغال شوې خاورې" توغندي توغولي.

د اسرایلو پوځ وروسته وویل د دوی په خاوره کې دوه توغندي په تش میدان لګېدلي او مرګژوبله یې نه ده اړولې.

غزې سره پر پوله د اسرایلو په اشکول سیمه کې د خطر زنګونه هم اورېدل شوي دي.

د هاریتز ورځپاڼه د دغې سیمې د یوه چارواکي اشکول ګدي یارکاني له خولې لیکي: "زه پر پوځ باور لرم چې په سوېل کې به د خلکو خونديتوب لپاره ټول اړین ګامونه پورته کړي".

اسرایلیان پر حماس ډلې چې غزه کې واکمنه ده، تور لګوي چې د سینا ولایت په نامه ډلې سره همکاري کوي، خو فلسطینیان دغه ادعا ردوي.

"تر کنترول لاندې"

د چارشنبې پر سهار اورپکو د شیخ زوید په سیمه کې پر پوځي پوستو او د پولیسو پر یوې تاڼې لږترلږه پنځه بریدونه وکړل.

عیني شاهدان راپور ورکوي چې دوی په واټونو کې اورپکي ولیدل چې له وسله والو ځواکونو سره په نښته کې وو.

د مصر د پوځ یوه ویاند برید جنرال محمد سمیر وروسته حکومتي تلویزون ته وویل حالت "په بشپړ ډول تر کنترول لاندې دی".

په دغه ناارامه سیمه کې ځای پر ځای شويو اورپکو د ۲۰۱۳ کال جولای میاشت کې د اسلامپالي ولسمشر محمد مرصي له پرځېدو وروسته خپل بریدونه زیات کړي دي.

له هغې راهیسې تر اوسه ۶۰۰ پولیس او وسله وال ځواکونه وژل شوي دي.

ورته مطالب