هند: پلازمېنه ډیلي کې پر دوو نورو ماشومانو جنسي تېری شوی

Image caption پلازمېنې ډيلي کې پر دوو ماشومانو جنسي تېري له پېښې وروسته پر ځايي چارواکو نیوکې ډېرې شوې دي

د هند پلازمېنه ډیلي کې پولیس وايي پر ماشومانو د جنسي تېري وروستیو دوو پېښو نه یوې کې دوو نامعلومو کسانو د جمعې په شپه د ښار لویدیځ کې دوه نیم کلنه ماشومه وتښتوله.

پولیس وايي، د ماشومې کور ته څېرمه یوه پارک کې د هغې له غورځولو مخکې پرې تښتونکو کسانو جنسي تېری کړی و.

د ځايي پولیسو یو افسر پوشپندرا کومار وايي:

' موږ د مشکوکو کسانو موندلو لپاره هلې ځلې پیل کړې، خو دم ګړۍ مو دې لړ کې څوک نه دي نیولي.'

بل لور ته د ښار ختیځ کې دریو کسانو پر یوې پنځه کلنې ماشومې جنسي تېری کړی دی.

پولیس وايي دغه ماشومه یادو کسانو د یوه ګاونډي کور ته بیولې وه او هلته یې پرې جنسي تېری کړی دی.

دواړه نجونې د درملنې لپاره روغتون ته لېږدولې شوې دي.

د ډیلي ښځو کمېسیون مشره سواتي مالیوال وايي هغه نجونې یې لیدلې، چې پرې تېری شوی دی او وايي حالت یې خواشینونکی دی.

د نوموړې په وینا د دغه ډول پېښو عاملینو ته د سزا ورکولو لپاره د دې په خبره ډېر څه نه دي شوي.

هغه وايي د مېرمنو سره د زور زیاتي ۱۱ زره پېښې د ۲۰۱۴ کال اوږدو کې ثبت شوې دي، چې وايي یوازې د نهو پېښو عاملین محاکمه شوي دي.

بل لور ته پلازمېنې ډيلي کې پر دوو ماشومانو جنسي تېري له پېښې وروسته پر چارواکو د ایالتی اعلی وزیر نیوکې ډېرې شوې دي.

ارون کجریوال پر حکومت تور پورې کړ، چې د ماشومانو خوندیتوب لپاره اړین اقدامات نه کوي.

وروستۍ پېښې پلازمېنه کې تېره اونۍ پر یوې څلور کلنې ماشومې د جنسي تېري له پېښې وروسته شوې.

تېر کال پر یوې محصلې د ډله ییز جنسي تېري له پېښې وروسته هند د دغه ډول پېښو مخنیوي لپاره قوانین سخت کړل.

اروین کجریوال پر لومړي وزیر نرېندرا مودي او ګورنر نجیب جنګ تور پورې کړ، چې ګواکې د ښار امنیت په ټینګښت کې پاتې راغلي دي.

ښاغلي کجریوال په خپل ټویټر پیغام کې لیکلي:

' پر ماشومانو د جنسي تېري پرلپسې پېښې هېښونکې او د شرم وړ دی، ډیلي پولیس د خلکو خوندیتوب لړ کې په بشپړه توګه نابریالي دي، لومړی وزیر او ګورنر یې څه کوي؟'

د ډيلي پولیسو مسوولیت د فدرالي حکومت کورنیو چارو وزارت پر غاړه ده.