امريکا: هوايي بريدونو کې د داعش يو شمېر مشران وژل شوي

د انځور حقوق EPA
Image caption عبدالحميد اباعود د ۲۰۱۳ کال په لومړيو کې له "اسلامي دولت" (داعش) ډلې سره يو ځای شوی و

د امريکا دفاع وزارت وايي، د دې هېواد په مشرۍ ايتلافي ځواکونو د تېرې يوې مياشتې هوايي بريدونو په عراق او سوريه کې د "اسلامي دولت" نومې ډلې لس مشران وژلي دي.

ډېری له دغو وژلو شوي کسانو نوامبر مياشت کې د پاريس له بريدونو سره چې ۱۲۹ کسان په کې وژل شوي وو، تړاو درلود.

د امريکا د دفاع وزارت وياند د يوه وژل شي کس نوم "شرف المودن ښودلی او ويلي يې دی چې نوموړي د پاريس د خونړيو بريدونو د پلان کوونکي عبدالحميد اباعود سره نېغ په نېغه اړيکه لرله.

شرف المودن د ډسمبر پر ۲۴ نېټه وژل شوی و.

عبدالحميد اباعود د ۲۰۱۳ کال په لومړيو کې له "اسلامي دولت" (داعش) ډلې سره يو ځای شوی و، چې د پاريس بريدونو څو ورځې وروسته د بلجيم پوليسو له خوا وژل شوی و.

د امريکا دفاع وزارت وياند ويلي، د نوموړې ډلې ځينې نورو وژل شويو مشرانو پر لوېديځ د بريدونو پلان درلود.

د امریکا پر مشرۍ ايتلاف له تېر يوه کال راهيسې په عراق او سوريه کې د "اسلامي دولت" ډلې پر ضد هوايي بريدونه کوي.

روسيه هم له څه مودې په سوريه کې پر داعش بريدونه کوي.

نوموړی هېواد وايي یوازې ترهګر او د "اسلامي دولت" ډلې جنګيالي په نښه کوي، خو فعالان بيا وايي دوی ډېری بريدونه د بشار اسد پر مخالفو ياغيانو چې د لوېديځ ملاتړ ورسره دی، ترسره کوي.

ملګري ملتونه وايي، د سوريې له کړکېچه پنځه کلونه کېږي چې تر ۲۵۰ زرو ډېر کسان په کې وژل شوي او په ميليونونو نور بې ځايه شوي دي.

ورته مطالب