د ٢٠ کوچنيانو په گډون ٤٢ کډوال سمندرکې مړه شوي

د انځور حقوق AP

لږ ترلږه ٤٢ کډوال چې له ترکيې يې يونان ته د داخلېدو هڅه کوله د يونان ايجه ټاپو سره نزدې په اوبو کې مړه شوي دي.

په مړو شوو کې ٢٠ کوچنيان دي.

د یونان پولیس وايي شاخوا ٥٠ نور کسان توانیدلي چې د کښتۍ له چپه کېدو وروسته ځانونه وچې ته ورسوي.

دا کسان د دوو کښتیو د ډوبېدو له امله مړۀ شوي دي. په دغو کښتیو کې سپرو کسانو هڅه کوله چې له ترکیې نه د سمندر له لارې اروپايي ته ځانونه ورسوي.

په یونان کې د بي بي سي خبریال دامیان ګراماتیکاس په خپل رپوټ کې وايي، په لومړۍ پېښه کې یوه لرګینه کښتۍ چې ۴۸ کسان پکې سپاره وو، د فارما کانیسي کوچني ټاپو ته څېرمه واوښته. دا پېښه د شپې په دوه نیمې بجې وشوه او داسې ښکاري چې په کښتۍ کې سپرو کسانو په سمندر کې پراته د لویو ډبرو خنډونه نه لیدل. په دوی کې ډېری د سمندر غاړې ته په وتلو وتوانېدل، خو ټول نېکمرغه نه وو. د یونان ساحلي ځواکونو په لومړیو هڅو کې له سمندره د شپږو ماشومانو او یوې مېرمنې مړي راوویستل.

د انځور حقوق AP
Image caption مړو شوو کې لږ ترلږه ٢٠ کوچنيان شامل دي

دویمه کښتۍ لږه وروسته له کالو لیمنوس ټاپو سره نژدې ډوبه شوه. فکر کېږي چې په دې کې تر ١٠٠ پورې کسان وو. د دوی له ډلې ٢٦ تنه په لومړي سر کې وژغورل شول، خو ډېر نور ښايي په یخو اوبو کې مړه شوي وي. د څوارلسو تنو مړي یې ساحلي ځواکونو د ورځې په لومړیو کې راوویستل، خو ډېری یې تري تم شول.

ساحلي ځواکونه او د اروپايي ټولنې د سرحدي ادارې فرنټېکس یوه چورلکه لا هم په سمندر کې لټون کوي. داسې ښکاري چې سړه هوا او خطرونه د کډوالو د هغه تکل مخه په بشپړ ډول نه نیسي، چې له مخې یې اروپا ته د رارسېدو هیله لري. په روان کال کې وار له مخه تر ٣٠ زرو ډېر کډوال د سمندر له لارې یونان ته راغلي دي.