د ترکیي ناکامه کودتا: د نیول شویو کسانو شمير ۶۰۰۰ ته ورسېد

د انځور حقوق AFP

رسنیو د ترکیې د عدلیې وزیر له قوله راپور ورکړی چې تر ناکامې کودتا وروسته د نیول شویو کسانو شمېر ۶۰۰۰ کسانو ته رسېدلی دی.

د ترکیې عدلیې وزیر بکر بزداغ ویلي، د پوځي ځواکونو او قضا تصفیه روانه ده او د نیول شویو کسانو شمېر به تردې هم ډېر شي.

ددغو کسانو نیولو ته په غبرګون کې د فرانسې د بهرنیو چارو وزیر خبرداری ورکړی چې د کودتا ناکامي په دې معنا نه ده چې رجب طیب اردوغان د خپلو مخالفینو د تصفیې لپاره "سپین چک" لري.

جان مارک ایرو وویل، د دوشنبې په ورځ بروکسل کې د اروپایي ټولنې په ناسته کې به پر دې خبرې ټینګار وشي چې ترکیه باید ځان د اروپایي دیموکراسۍ له اصولو سره برابره کړي.

نن یکشنبې (جولای ۱۷مه) د ترکیې په لویدیځ دنیزلي ولایت کې له ۵۰ ډېر لوړپوړي پوځیان ونیول شو.

د روسیې ولسمشر ولادیمیر پوتین له ښاغلي اردوغان سره پر ټېلفون خبرې کړي او د کودتا هڅې د غندلو ترڅنګ هیله ښوولې چې ترکیه هرڅه ژر بېرته خپل ټیکاو ترلاسه کړي.

د شنبې په ورځ وروسته له هغه چې د ترکیې دولت د حالاتو کنټرول خپل کړ، نژدې ۳۰۰۰ سرتېري ونیول شول او د نژدې ۲۷۰۰ قاضیانو دندې وځنډول شوې.

د راپورونو له مخې د ترکیې ځینې جنرالان هم د نیول شویو کسانو په ډله کې دي.

د ترکیې د شنبې شپې ناکامې کودتا کې د وژل شویو کسانو شمېر ۲۶۵ کسانو ته رسېدلی چې تر ډېره ملکي وګړي دي.

نن د ترکیې ولسمشر رجب طیب اردوغان استانبول کې د ځینو وژل شویو کسانو د جنازې په مراسمو کې ګډون کړی.

د ترکیې لومړي وزیر بن علي ییلدیریم د کودتا دا طرحه "د ترکیې پر دیموکراسۍ تور ننګین داغ" بللی دی.

د جمعې په ماښام په استانبول او انقره کې د چاودنو له غږونو، ډزو او په ټیټه ارتفاع کې د چورلکو ټیټو الوتنو په پام خبریالانو د غیر عادي وضعیت خبره کوله.

په استانبول او نورو ښارونو کې په لوی شمېر خلک لارو ته راوتلي او د دولت په ملاتړ او د هغو کسانو پرضد شعار ورکوي چې د شنبې په شپه یې پر دولت د کودتا هڅه وکړه.

ولسمشر او د د ترکیې دولت کابینې له خلکو غوښتي و چې "له دیموکراسي دفاع" لپاره لاریون وکړي.

د انځور حقوق Getty

ورته مطالب