د هیلري کلنټن د ټاکنیز کمپاین کمپیوټرونه ''هک'' شوي

د انځور حقوق Reuters

د امریکا خبري رسنیو ویلي، د ډیموکراټ ګوند د بنسټونو پرضد د لوی الکټرونیکي برید په لړ کې د ولسمشرۍ د نوماندې هیلري کلنټن د ټاکنیز کمپاین کمپیوټرونه هک شوي.

په دې الکټرونیکي برید کې د ډیموکراټ ګوند د ملي جرګې معلوماتو ته لاسرسی پیدا شوی او د ډیموکراټانو د کانګرس جرګه ګۍ په نخښه شوې ده.

امریکايي چارواکي وايي، اټکل دی چې دا پراخ بریدونه به د روسي حکومت په پلوۍ د امریکا ځینو وکیلانو کړي وي.

ځینې وېره لري چې روسیه غواړي د امریکا پر ټاکنو خپل اغېز پرېباسي.

د روسیې حکومت په دغو بریدونو کې خپل لاس لرل رد کړي او د واشنګټن دا څرګندونې یې د ''روسیې ضد زهرجنې'' ویناوې بللې دي.

د جمعې په ورځ هیلري کلنټن وویل، د معلوماتو د شننې پروګرام، چې له نورو بنسټونو سره هم شریک دی، د انټرنېټي غلو له خوا له برید لاندې راغلی.

د کلنټن مطبوعاتي سکرتر نیک میریل وویل ''داسې ثبوت نه شته چې ګني زموږ داخلي سیستمونه دې مات شوي وي''.

د انځور حقوق Getty
Image caption کلنټن د پنجشنبې په ورځ رسماً د ډیموکراټ ګوند له خوا ولسمشرۍ ته نومانده اعلان شوه

د فیډرالي تحقیقاتو دفتر ویلي، ددغو ادعاوو څېړنه کوي.

تېره اونۍ د ډیموکراټ ګوند د ملي جرګې ځانګړي برېښنالیکونه د ګوند د غونډې پر بېګا مات کړل شول.

په ماتو شویو برېښنالیکونکو کې راغلي وو، چې د ډیموکراټ ګوند چارواکي په لومړنیو ټاکنو کې د برني سنډرز پرضد دي، ځکه هغه د هیلري کلنټن پلوی شوی.

د ګوند د زرګونو برېښنالیکونو ماتولو ته د ډېرو پام وراوښتی، همدا وو چې د ګوند عمومي منشي دبي واسرمن شولټز استعفا وکړه.

د انځور حقوق AFP

ورته مطالب