امریکا پر پاکستان میلیونونه ډالره پوځي مرسته درولې

په دې وسیله کې د غږ اوريدل او ویډیو لیدنه شونې نه ده.

د امریکا متحده ایالاتو د دفاع وزارت د پاکستان لپاره ۳۰۰ میلیونه ډالره مرستې ځکه درولې، چې وايي، پاکستان د حقاني شبکې پرضد عمليات نه دي کړي.

د پينټاګون د ویاند په خبره د امريکا د دفاع وزیراش کارټر د هغه سند له ورکولو انکار کړی، چې له مخې به يې پاکستان ته دغه مرسته ورکول کېده. امريکا پاکستان ته له ۲۰۰۲ عیسوي کال راهیسې د ایتلافي ملاتړ مرستې په لړ کې دغه مرستې ورکوي.

د انځور حقوق bbc
Image caption د پاکستان بهرنیو چارو وزارت ویاند نفیس زکریا خبرې غونډې ته وویل، پاکستان به د سخت دریځو خلاف فعالیتونه روان ساتي

بل لور ته پاکستان ویلي، دوی نه یوازې د ترهګرۍ خلاف مبارزه کوي، بلکې د ترهګرۍ خلاف مبارزې کې له نړیوالې ټولنې سره هر ډول شونې مرسته کوي. اسلام اباد کې د پاکستان بهرنیو چارو وزارت ویاند نفیس زکریا خبرې غونډې ته وویل، پاکستان به د سخت دریځو خلاف فعالیتونه روان ساتي او ترهګرو ته به اجازه ور نه کړي، چې دغه هېواد کې پټنځایونه ولري.

د ۲۰۱۵م عیسوي کال لپاره امریکا په دې لړ کې د پاکستان لپاره زر میلیونه ډالره مرسته ټاکلې وه، خو کانګریس ددې مرستې شاوخوا درې سوه ملیونه له دغه شرط سره تړلي و، چې پاکستان به د حقاني شبکې پرضد عملي ګام اخلي او که د امریکا د دفاع وزیر ددوی له دغه ګامه ډاډه شي، په ځواب کې به يې ددغه درې سوه میلیونه ډالرو د مرستې ورکول تایید کړي.

امریکا وايي، پاکستان په شمالي وزیرستان کې د ضرب عضب په نامه عملياتو کې د ډېرو وسلوالو ډلو پرضد ګام واخیست خو حقاني شبکه او افغان طالبانو ته يې هېڅ ونه ویل او دغه دواړه ډلې اوس هم هلته فعالې دي.

د انځور حقوق AFP
Image caption ددغو پوځي مرستو اووه سوه میلیونه ډالره مخکې لا پاکستان ته ورکړل شوي خو پاتې درې سوه میلیونه يې اوس نه ورکول کېږي.

حقاني شبکه د وسلوالو طالبانو تر ټولو فعاله ډله ده، چې د امریکا په خبره د پاکستان له خاورې په افغانستان کې ترهګریز بریدونه پلانوي. وړاندې هم څو ځله نړۍ د پاکستان پوځي څارګره اداره ای ایس ای ددغې ډلې په ملاتړ او مرستې تورنه کړې وه.

په امریکا کې د بارک اوباما حکومت له راتګه وروسته دا لومړی ځل دی چې د پاکستان لپاره مرستې درېږي. ددغو پوځي مرستو اووه سوه میلیونه ډالره مخکې لا پاکستان ته ورکړل شوي خو پاتې درې سوه میلیونه يې اوس نه ورکول کېږي.

امریکا د ۲۰۱۶م عیسوي لپاره هم مخکې لا د زر میلیونه ډالره بودیجې پر ځای نهه سوه ملیونه ډالره کړې او دا ځل يې له همدې شرط سره درې نیم سوه میلیونه ډالره تړلي، چې که پاکستان بیا هم د حقاني شبکې پرضد ګام نه اخلي، دا ځل به يې له دغې مرستې درې نیم سوه میلیونه امريکايي ډالر کم کړي.

د انځور حقوق AFP
Image caption تردې وړاندې امریکا پاکستان د ایف ۱۶ جنګي الوتکو لپاره هم پاکستان ته ورکول کېدونکې مرستې درولې وې

په واشنګټن کې د پاکستاني سفارت ویاند ندیم هوتیانا د بي بي سي خبریال برجېش اوپاديايې ته ویلي، دغې مرستې پاکستان ته د ترهګرو د له منځه وړلو لپاره ورکول کېږي، چې په کې د پاکستان او امریکا دواړو ګټه ده. دغه ویاند ویلي، پاکستان د ضرب عضب په نامه عملياتو کې د هر ډول وسله والو پرضد عمليات کړي او تر منځ يې هېڅ توپیر نه دی کړی.

د کارپوهانو په خبره د امريکا لخوا د پاکستان لپاره ددغو مرستو د درولو له امله به د دواړو هېوادونو ترمنځ اړیکې لانورې ترینګلې شي.

تردې وړاندې امریکا پاکستان د ایف ۱۶ جنګي الوتکو لپاره هم پاکستان ته ورکول کېدونکې مرستې درولې وې.

د کارپوهانو په خبره دغه مرستې د پاکستان پوځ لپاره مهمې دي، ځکه چې هغوی له مودې راهیسې همدا مرستې د خپلې بودیجې برخه ګڼله.

امریکا له ۲۰۰۲ عیسوي کاله راهیسې په دې لړ کې پاکستان ته شاوخوا ۱۴ میلیارده امریکايي ډالره مرسته ورکړې.

ورته مطالب