بلوڅ بېلتونپال: اشرف غني باید نرېندرا مودي ته ورته اقدام وکړي

په دې وسیله کې د غږ اوريدل او ویډیو لیدنه شونې نه ده.

بلوڅ بېلتونپال یو مشر حربيار مري وايي له افغان ولسمشر نه هیله کوي، چې د هندي لومړي وزیر نرېندرا مودي په څېر اقدام وکړي او له بلوڅانو سره مرسته د خپلې بهرنۍ پالیسي یوه برخه کړي.

له بي بي سي سره یوې مرکې کې نوموړي وویل، له پاکستانه بشپړه ازادي هغه څه دي چې د بلوڅانو ستونزې حل کولای شي او وايي دوی د افغانستان، هند او بنګله دېش په ګډون له شاوخوا ټولو هېوادونو غواړي، چې د ده په وینا د دوی 'پر ځای هلو ځلو' کې ورسره مرسته وکړي.

یوه بل سویس مېشتي بېلتون پال بلوڅ مشر برهمداخ بوګټي له هنده سیاسي پناه غوښتې کړې. ځینې ملتپال بلوڅان په دې باور دي چې دا ډول پرېکړې به د بلوڅانو پر ازادي غوښتونکي غورځنګ ناوړه اغیز وکړي او د پاکستان دا تورونه به نور هم پیاوړي شي، چې ګواکې په بلوچستان کې د ازادۍ کوم غورځنګ نشته، بلکې هند په دغه ایالت کې لاسوهنه کوي؟

"کرزي د بلوچستان په اړه د مودي د څرګندونو ملاتړ کړی"
د انځور حقوق BBC World Service
Image caption بېلتون پال بلوڅ مشر برهمداخ بوګټي له هنده د سیاسي پناه غوښتې کړې

ښاغلی مري د دغې پوښتنې په ځواب کې وايي، پاکستان به د ښاغلي برهمداخ له دې پرېکړې نه د سیاسي ګټې اخیستو هڅه وکړي او زموږ پر ضد به جهادي ډلې د جګړې ډګر ته واستوي، چې وايي دا اوس هم دغه سخت دریځي وسله وال د دوی پر ضد فعالیتونه کوي.

بلوڅ بېلتون پالی وايي، اوسمهال یې په هند کې د پناه اخیستو په اړه فکر نه دی کړی او نه کوم داسې هوډ لري، ځکه وايي بریتانیا پناه ورکړې ده او که د بریتانیا لخوا اړ شي بیا به د ملګرو په سلا مشوره په هند کې د پناه اخیستو په اړه پرېکړه کوي.

د روانې میاشتې نیمايي کې د هندوستان دولتي خپرنیزې ادارې 'ال انډيا ريډيو' بلوڅي ويبپاڼه او يو موبايل اپ پيلول اعلان کړل.

د بلوڅي ژبې یبپاڼه

د هند لومړي وزير نرېندر مودي تيره مياشت يوې خبري غونډې ته ويلي و، هند به په بلوچستان او ګلګت بلتستان کې د پاکستان حکومت زور زياتي ته د نړۍ پام اړوي او اسلام اباد ته د دې زياتي ځواب ورکول اړین دي.

له هغه وروسته د اګسټ پر ۱۵ د هند د خپلواکۍ ورځې مراسمو کې نرېندر مودي یو ځل بیا بلوڅانو ته اشاره وکړه او ویې ویل، د بلوچستان د مسلې د راپورته کولو له امله یې مننه ترې کړې ده.

له هغه وروسته هندي رسنیو د بلوچستان په تړاو ډېر خبرونه، شننې او له ملتپالو بلوڅانو سره مرکې خپرې کړې.

حربیا مري په دې اړه وايي، هند د بلوڅانو غږ پورته کړی دی او موږ یې د دغه اقدام ستاینه کوو، خو نوموړی وايي د بېلتون پالو ټول مشران به دې ته زړه ښه نه کړي، چې هند کې سیاسي پناه وغواړي.

دا وروستیو کې امریکايي چارواکو ویلي و، چې د بلوچستان موضوع د پاکستان کورنۍ مساله ده او دوی په کې لاسوهنه نه کوي.

د دغې پوښتنې ته ځواب کې ښاغلي مري وویل، امریکایان اوس د بلوچستان له حالته خبر دي او دوی به هم د ده په وینا بالاخره د بلوچستان ازادي ومني.

ورته مطالب