کشمير: پاکستان او هند يو پر بل ډزې کړې دي

په دې وسیله کې د غږ اوريدل او ویډیو لیدنه شونې نه ده.

تر هغه دوې اوونۍ وروسته چې د پاکستان او هند تر منځ پوځي کړکېچ زیات شوی، دواړه خواوې یو بل د هغه اوربند په ماتولو تورنوي چې په تخنیکي توګه ۱۳کاله په کشمیر کې د کنټرول پر کرښه روان دی.

هند او پاکستان دواړه ادعا کوي چې ځوابي ډزې یې کړې دي، دا لا نه ده روښانه چې لومړی برید چا کړی دی.

پاکستان ادعا کوي چې هندي پوځ د بیمبر سیمې ته نژدې د سپکو وسلو او هاوان ډزې کړې دي. خو بل لور ته د هند دولتي راډیو بیا تور لګوي چې پاکستاني پوځ په جمو کې د اخنور پر سیمه بريد کړی دی.

یو شمېر نورې هندي رسنۍ بیا وایي، د پاکستاني برید له کبله یو شمېر سیمه ییز خلک له خپلو کورونو خوندي ځایونو ته لېږدول شوي دي.

په ورته وخت کې په دواړو هېوادونو کې د خلکو احساسات هم راپارېدلي. سیاستوال هم په لویو جلسو کې پر پوله تاوتریخوالي ته اشاره کوي.

هند د تېرې پنجشنبې پر ورځ ويلي وو، له پولې هاخوا یې د پاکستان تر ولکې لاندې کشمیر کې ترهګر په نښه کړي او مرګژوبله یې ور اړولې. پاکستان بیا د هند دغه ادعا په کلکه ردوي.

د انځور حقوق Getty
Image caption د ملګرو ملتونو سرمنشي بانکي مون پر دواړو هېوادونو غږ کړی چې له زغمه کار واخلي

په ورته وخت کې د ملګرو ملتونو سرمنشي بانکي مون پر دواړو هېوادونو غږ کړی چې له زغمه کار واخلي او داسې ګام دې نه پورته کوي چې روان تاوجن حالت له کنټروله ووځي.

په هغه اعلامیه کې چې د ښاغلي بانکي مون د ویاند لخوا خپره شوې، د ملګرو ملتونو سرمنشي د هند او پاکستان ترمنځ د روان ناورین د ختمولو لپاره د منځګړتوب وړاندیز هم کړی دی.

تر دې وړاندې د په ملګرو ملتونو کې د پاکستان استازې مليحې لودي د بانکي مون سره ليدلي وو. د پاکستان د حکومتي راديوډ په وينا، بانکي د کنټرول پر کرښه د "دوو پاکستاني پوځيانو "په مړينه خواشيني ښودلې.

ميلحې لودي د ملګرو ملتونو سرمنشي ته د هند تر ولکې لاندې کشمير کې د خرابېدونکي حالت په اړه معلومات ورکړي او ويلي يې دي چې د هند کړنې په سيمه او نړۍ کې د امن لپاره ګواښ پېښولی شي.

د انځور حقوق EPA
Image caption د روانو حالاتو له امله د پولې دواړو غاړو ته مېشت خلک خوندي ځايونو ته لېږدول شوي دي.

نوموړې له بانکي مون غوښتي چې د هند تر ولکې لاندې کشمير کې د بشري حقونو د سرغړونو د مخنيوي لپاره خپل رول ولوبوي.

د روانو حالاتو له امله د پولې دواړو غاړو ته مېشت خلک خوندي ځايونو ته لېږدول شوي دي.

اړونده مطالب

ورته مطالب