طالبان فعالیت شبکه‌های مخابراتی خصوصی را در هلمند قطع کرده‌اند

. حق نشر عکس Getty Images
Image caption در سال ۲۰۱۱ هم گروه طالبان فعالیت شبکه‌های خصوی مخابراتی را برای ده روز قطع کرده بودند

وزارت مخابرات افغانستان می‌گوید که گروه طالبان فعالیت شبکه‌های خصوصی مخابراتی را قطع کرده است.

قاری یوسف احمدی، سخنگوی گروه طالبان، به بخش پشتوی بی‌بی‌سی قطع فعالیت شبکه‌های خصوصی در این ولایت را تایید کرده و گفته است که روی "مصلحت‌هایی" این کار انجام داده‌اند.

سخنگوی گروه طالبان در مورد "مصلحت‌های" خود توضیح نداده است، اما در هلمند از چند وقت بدینسو عملیات نظامی دولت با همکاری نیروهای بین‌المللی ادامه دارد. همچنین حملات بر مزارع کشت کوکنار هم تشدید یافته است.

مقام‌های محلی می‌گویند که در مرکز ولایت، تنها یک شبکه دولتی فعال است.

باشندگان هلمند می‌گویند که قطع شبکه‌های خصوصی مخابراتی، زندگی آنها را به مشکل مواجه کرده و تاثیر منفی بر زندگی آنها داشته است.

در سال ۲۰۱۱ هم گروه طالبان فعالیت شبکه‌های خصوی مخابراتی را برای ده روز قطع کرده بودند.

ولایت هلمند یکی از ولایت‌های است که طالبان نفوذ زیادی در آن دارد. در هفته‌های گذشته شماری از مردم هلمند برای دست‌یابی به صلح خیمه‌های اعتراضی برپاکرده اند.