بررسی احتمال دست داشتن افغان‌ها در ناآرامی‌های تاجیکستان

حامد کرزی، رییس جمهور افغانستان، به دولت تاجیکستان وعده داده که آن کشور آماده همکاری با تاجیکستان برای آرام کردن وضعیت مرز مشترک آن دو کشور است.

ایمل فیضی، سخنگوی رئیس جمهوری افغانستان، به بی‌بی‌سی گفت که آقای کرزی پس از گفت‌و‌گوی تلفنی با امام علی رحمان، همتای تاجیک اش، وعده داده که نیروهای افغان، آماده هر نوع همکاری برای آرام کردن وضعیت در منطقه مرزی دو کشور هستند.

منابعی در تاجیکستان گزارش داده اند که حامد کرزی به امام علی رحمان گفته افغانستان نیروهای اضافه مرزبانی و امنیتی به منطقه هم‌مرز با بدخشان تاجیکستان خواهد فرستاد.

به نوشته سایت ریاست جمهوری تاجیکستان، آقای کرزی این موضوع را روز چهارشنبه ۲۵ جولای/ژوئیه در گفت‌وگوی تلفنی با امام‌علی رحمان مطرح کرده است.

سایت ریاست جمهوری تاجیکستان نوشته است که گفت‌وگوی تلفنی میان دو رئیس جمهوری "به ابتکار طرف افغانی" انجام شده است.

رئیسان جمهوری تاجیکستان و افغانستان همچنین توافق کرده‌اند که برای تأمین امنیت در مرز مشترک دو کشور و جلوگیری از هر گونه اعمال تروریستی و غیرقانونی اقدامات مؤثری انجام دهند.

وضعیت در ولایت بدخشان تاجیکستان بعد از کشته شدن ژنرال عبدالله‌ نظراف، رئیس بخش امنیت این ولایت، متشنج شده است.

دولت تاجیکستان، طالب ایام‌بیک‌اف، معاون فرمانده گذرگاه مرزی اشکاشم را که در زمان جنگ داخلی این کشور از فرماندهان بانفوذ نیروهای مخالف دولت بود، در قتل ژنرال نظراف دخیل می‌داند.

صبح روز ۲۴ جولای نیروهای امنیتی و پلیس تاجیکستان برای بازداشت آقای ایام‌بیک‌اف و هوادرانش، عملیات ویژه‌ای در شهر خاروغ مرکز بدخشان آغاز کردند که به گزارش منابع دولتی، به کشته شدن بیش از ۴۰ نفر، از جمله ۱۲ نیروی دولتی انجامید و به غیرنظامیان تلفاتی وارد نشده است. ولی منابع مستقل می‌گویند ده‌ها نفر از غیرنظامیان قربانی درگیری شده‌اند.

مقام‌های امنیتی و پلیس همچنین از بازداشت ۴۰ شورشی، از جمله ۸ شهروند افغان خبر داده‌اند.

برخی منابع می‌گویند که فرماندهان محلی در بدخشان افغانستان با افراد مسلح مخالف دولت تاجیکستان هم‌دست‌اند.

به اعتقاد کارشناسان، گفت‌وگوی تلفنی آقایان رحمان و کرزی در باره وضعیت بدخشان احتمالاً با این موضوع ارتباط دارد.

برخی از رسانه‌ها پیشتر گزارش کرده بودند که طالب ایام‌بیک‌اف، سرکرده شورشیان در بدخشان، در پی عملیات نیروهای دولتی به منطقه‌ هم‌مرز در ولایت بدخشان افغانستان فرار کرده است. منابع مستقل این خبر را تایید نکرده اند.