کرزی برای امضای چند 'موافقت‌نامه' به تاجیکستان سفر کرد

Image caption حامد کرزی به دعوت رسمی رئیس جمهوری تاجیکستان به دوشنبه سفر کرده است

حامد کرزی، رئیس جمهوری افغانستان، با هدف گفت‌وگو در مورد تقویت روابط و همکاری‎های بین کابل و دوشنبه به تاجیکستان سفر کرده است.

دفتر ریاست جمهوری افغانستان در بیانیه‌ای گفته است که این سفر دو روزه به دعوت رسمی امامعلی رحمان، رئیس جمهوری تاجیکستان، انجام شده است.

در همین حال جانان موسی‌زی، سخنگوی وزارت امور خارجه افغانستان، به بی‌بی‌سی گفت که در این سفر آقای کرزی تصمیم دارد با همتای تاجیکی خود سه سند همکاری به امضا برساند.

به گفته سخنگوی وزارت امور خارجه افغانستان دو موافقت‌نامه در بخش‌های مین روبی و خدمات بیمه‎‌ای خواهد بود و سند دیگر، موافقت‌نامه الحاقی برای تسهیل رفت و آمد زمینی بین شهروندان دو کشور است.

آقای موسی‌زی همچنین گفت که هدف امضای موافقت‌نامه در مورد همکاری‎‌های مین روبی، اطمینان از جان شهروندان در مرزهای دو کشور است و همچنین با توجه به روابط تجاری، ترانزیتی و سرمایه‌گذاری بین دو کشور، امضای موافقت‌نامه بیمه فعالیت‌های سرمایه‌گذاران را در دو کشور تسهیل می‌کند.

مقام‌های افغان در مورد این موافقت‌نامه‌ها جزئیاتی ارائه نداده‌اند؛ اما وزارت امور خارجه می‌گوید که رئیس جمهوری افغانستان و رئیس جمهوری تاجیکستان در پایان سفر آقای کرزی در مورد نتایج این سفر اعلامیه مشترکی خواهند داشت.

در گذشته افغانستان و تاجیکستان در چند بخش از جمله استرداد زندانیان موافقت‌نامه امضا کرده‌اند.

در این سفر رنگین دادفر سپنتا مشاور شورای امنیت ملی، عمر زاخیلوال وزیر مالیه، نجیب‌الله اوژن وزیر فواید عامه، ضرار احمد مقبل وزیر مبارزه با مواد مخدر و چند مقام بلند پایه افغان آقای کرزی را همراهی می‌کنند.

مقام‌های وزارت خارجه می‌گویند که حامد کرزی در یازده سال حکومت خود هفت سفر به تاجیکستان داشته و روابط دو کشور "بیشتر از هر زمانی گسترش و توسعه" پیدا کرده است.

افغانستان می‌گوید که دو کشور علاقمند هستند تا در بخش‌های مختلف از جمله مبارزه با تروریسم، افراط گرایی و همکاری‌های تجاری و ترانزیتی با هم روابط نزدیک داشته باشند.

تاجیکستان و افغانستان حدود ۱۳۰۰ کیلومتر مرز مشترک دارند و پیوندهای فرهنگی، زبانی و تاریخی نزدیک روابط میان دو کشور را معمولا محکم نگهداشته است.

قاچاق مواد مخدر و فعالیت گروه‌های شورشی در مسیر مرزهای دو کشور از عمده ترین موارد نگرانی بین افغانستان و تاجیکستان بوده است.

مطالب مرتبط