حمله به یک دیپلومات تاجیک در شمال افغانستان

پرچمهای تاجیکستان و افغانستان حق نشر عکس BBC World Service
Image caption تاجیکستان و افغانستان با هم روابط نزدیکی دارند

رستم محمودی، کنسول تاجیکستان در ولایت بدخشان افغانستان، در راه سفر از شهر فیض‌‌آباد به قندز هدف حمله افراد ناشناخته قرار گرفته است.

این واقعه قبل از ظهر روز جمعه 16 مه در منطقه "خان آباد" ولایت قندز اتفاق افتاده و آقای محمودی با جراحات مختلف به بیمارستانی در شهر قندز منتقل شده است.

عبدالفیض عطایف، سخنگوی وزارت خارجه تاجیکستان، ضمن تأیید این خبر به بی بی سی گفت این حمله زمانی صورت گرفته که دیپلومات تاجیک با خودرو از بدخشان به سمت قندز در حرکت بود.

وی گفت: "در راه افراد مسلح خودرو دیپلومات تاجیک را تعقیب کرده‌اند و چون او سرعت را سست کرده، هدف تیراندازی این افراد قرار گرفته است. در نتیجه، رستم محمودی از دست راست و پایش مجروح شده و حالا در بیمارستانی برای خارجیها در قندز بستری است."

سخنگوی وزارت خارجه تاجیکستان افزود که وضع آقای محمودی پس از عملیات جراحی بهتر شده و او صحبت کرده است. قرار است پزشکان ژاپنی در بیمارستان قندز یک عمل دیگر جراحی با او انجام دهند. در صورت ضرورت او به وطن انتقال داده خواهد شد.

به گفته آقای عطایف، نهادهای امنیتی تاجیکستان و افغانستان به تحقیق مشترک این حادثه و شناسایی هویت افراد مهاجم آغاز کرده‌اند. وی افزود که این واقعه در روابط "صمیمی و دوستانه" دو کشور همجوار تاجیکستان و افغانستان هیچ تأثیری نخواهد گذاشت.

قبلاً رسانه‌های افغانستان با استناد به سعید سرور حسینی، یک مسئول پلیس ولایت قندز، نوشته بودند که ماشین کنسول تاجیکستان هدف تیراندازی افراد مسلح قرار گرفته و خود او مجروح شده است، ولی کسی دیگر از همراهانش آسیب ندیده است.

پلیس محلی در شمال افغانستان می‌گوید که تا حال هیچ گروه و یا فردی مسئولیت حمله به دیپلومات تاجیک را به دوش نگرفته است. اما گروه طالبان در هفته جاری حملات خود را در مناطق مختلف افغانستان افزایش داده است.

تاجیکستان با افغانستان بیش از 1300 کیلومتر مرز مشترک دارد. دولتهای این دو کشور با هم روابط خوبی دارند. تاجیکستان به علاوه سفارتش در کابل، در شهرهای مزار شریف، قندز و فیض‌‌آباد، در شمال افغانستان، کنسولگری دارد.