'දූෂිත ඇමතිවරුන් ගැන පියවර ගන්න'

  • 2016 සැප්තැම්බර් 14
Image caption මහාචාර්ය සරත් විජේසුරිය

මහින්ද රාජපක්ෂ පරිපාලනයට එරෙහි වංචා දූෂණ පිළිබඳ පරීක්ෂණ කඩිනම් කිරීම, දූෂණ චෝදනා ලබා සිටින වත්මන් පාලනයේ ඇමතිවරුන්ට එරෙහිව පියවර ගැනීම ඇතුළු තමන් ඉදිරිපත් කළ යෝජනා පහකට ජනාධිපතිවරයාගෙන් සාධනීය ප්‍රරතිචාරයක් පළ වූ බව සමාජ ක්‍රියාධරයන් පිරිසක් පවසති.

මෙම සිවිල් සමාජ ක්‍රියාධරයන් පිරිස ජනාධිපති මෛත්‍රිපාල සිරිසේන වෙත එම යෝජනා ඉදිරිපත් කර තිබෙන්නේ ඊයේ රාත්‍රියේ (13) පැවති සාකච්ඡාවක දීයි.

මේ පිළිබඳව බීබීසී සංදේශය කළ විමසීමකදී සාධාරණ සමාජයක් සඳහා වූ ව්‍යාපාරයේ මහාචාර්ය සරත් විජේසුරිය කියා සිටියේ ජනාධිපතිවරයාට දුන් සංදේශයේ යෝජනා පහක් ඇතුළත් වූ බවයි.

රාජ්‍ය නිලධාරීන්

පවතින පාලනය දුර්වල කිරීමේ අරමුණින් රජයට තර්ජනය කරන නිලධාරීන් පිළිබඳව දැඩි තීරණ ගැනීම සහ යහපාලනය ස්ථාපිත කිරීම සඳහා අවශ්‍ය පාලන සම්ප්‍රදායන් ඇති කිරීමට අගමැතිවරයා සමඟ එක් වී මීට වඩා උනන්දුවෙන් කටයුතු කළ යුතු බවද ඔවුන් යෝජනා කර තිබේ.

අගමැතිවරයා සමඟ ද සාකච්ඡා කර මෙම යෝජනා ක්‍රියාත්මක කිරීම සඳහා කළ හැකි සෑම දෙයක් ම කරන බවට ජනාධිපතිවරයා ප්‍රතිඥා දුන් බවයි මහාචාර්ය සරත් විජේසුරිය බීබීසීයට කියා සිටියේ.

දූෂණ චෝදනා පිලිබඳ නඩු විභාග කඩිනමින් නිම කිරීම සඳහා විශේෂ අධිකරණ පිහිටුවීම දැනට පවතින අධිකරණ පද්ධතිය යටතේම සිදු කළ හැකි බවයි ඔහු පවසන්නේ.

රජය අපහසුතාවයට පත් කරන නිලධාරීන් පිළිබඳව විමසූ විට මහාචාර්යවරයා උදාහරණයක් හැටියට පෙන්වා දුන්නේ විගණන පනත සම්මත වීමට ඉඩ නොදෙන අමාත්‍යංශ ලේකම්වරුන් පිරිසකි.