ඔබේ දුරකථනයේ හෝ පරිගණකයේ මෙය වාදනය කිරීමට අදාළ මෘදුකාංග නැත

දෙමළ වැරදීම ගැන සමාව යදිනවා - ඇමති වාසු

  • 2014 පෙබරවාරි 4

ශ්‍රී ලංකාවේ රාජ්‍ය ආයතනවල නාම පුවරු හා ලිපි ලේඛන වල දෙමළ අකුරු වැරදීම සහ වැරදි අරුත් දෙන වදන් භාවිත කිරීම පිළිබඳව ජාතික භාෂා හා සමාජ ඒකාබද්ධතා අමාත්‍යවරයා දෙමළ ජනතාවගෙන් සමාව ඉල්ලා සිටියි.

රටේ බොහෝ රාජ්‍ය ආයතනවල සවි කොට තිබෙන නාම පුවරු සහ අදාළ ආයතනවලින් ජනතාවට ලැබෙන ලිපිවල පවා වැරදි අරුත් දෙන ආකාරයෙන් දෙමළ භාෂාව භාවිතා කෙරෙන බව බීබීසී සංදේශය පෙන්වා දුන් අවස්ථාවේයි, අමාත්‍ය වාසුදේව නානායක්කාර එසේ සමාව ඉල්ලා සිටියේ.

රටේ ප්‍රධාන භාෂා තුනෙන්ම නාම පුවරු ප්‍රදර්ශනය කිරීමට ආණ්ඩුවේ ත්‍රෛභාෂා ව්‍යාපෘතියේ මූලිකත්වය හිමි වන බවද අමාත්‍යවරයා සඳහන් කළේය.

එහෙත් බොහෝ රාජ්‍ය ආයතනවල දෙමළ භාෂාව නිසි ආකාරයෙන් භාවිත නො කරන බවයි, දෙමළ සිවිල් සංවිධාන පවසන්නේ.

බස් සහ දුම්රිය වෙනි රජයේ ගමනාගමන සේවාවන්හි දිනපතා දක්නට ලැබෙන වැරදීම් පිළිබඳව දෙමළ ජනතාව කලකිරීමට පත් වී සිටින බව ශ්‍රී ලංකා විකල්ප සංවර්ධන කේන්ද්‍රයේ අධ්‍යක්ෂ එස් බාලක්‍රිෂ්ණන් සංදේශයට කියා සිටියේය.

Image copyright lanintegmin.gov.lk

එවැනි තත්වයක් තිබෙන බව පිළිගන්නා අමාත්‍ය වාසුදේව නානායක්කාර, එවැනි වැරදීම් පිළිබඳව තමන්ට දන්වන ලෙස ජනතාවගෙන් ඉල්ලා සිටියි.

ජාතිය සමගිය ගොඩ නැංවීමේ අරමුණින් රජය භාෂා ප්‍රතිපත්ති ක්‍රියාත්මක කරන බව පවසන විෂය බාර අමාත්‍යවරයා, අමාත්‍යාංශය යටතේ කමිටුවක් පත් කරමින්, රට පුරාම භාෂා වැරදි සොයා පිළියම් යෙදිය යුතු බවයි, විකල්ප සංවර්ධන කේන්ද්‍රයේ අධ්‍යක්ෂවරයා මේ අතර පෙන්වා දෙන්නේ.

මෙවැනි වැරදිවලින් පවා ජාතීන් අතර සමගියට බාධා එල්ල විය හැකි බවත් එස් බාලක්‍රිෂ්නන් වැඩිදුරටත් කියා සිටියේය.