ඔබේ දුරකථනයේ හෝ පරිගණකයේ මෙය වාදනය කිරීමට අදාළ මෘදුකාංග නැත

‘බන්දුල විතානගේ අභියෝග ජයගත් නාට්‍ය ශිල්පියෙක්’ - ටෝනි රණසිංහ

Image copyright dailynews.lk

‘ෂේක්ස්පියර්’ නාට්‍ය නිර්මාණ සිංහල වේදිකාව මතට ගෙන ඒම දුෂ්කර අභියෝගයක් බවට පැවති අදහස මිථ්‍යාවක් බව දිවියෙන් සමුගත් නාට්‍යවේදී බන්දුල විතානගේ ක්‍රියාවෙන් ඔප්පු කර ඇතැයි ප්‍රවීණ රංගධර ටෝනි රණසිංහ පවසයි.

ඔහු එම ප්‍රකාශය කළේ බීබීසී සංදේශය සමඟ පැවැත්වූ විශේෂ සාකච්ඡාවකදී.

‘වැනිසියේ වෙළෙන්දා’ (Merchant Of Venice) සාර්ථක පරිවර්තනයක් සහ අධ්‍යක්ෂණයක් සහිතව සිංහල වේදිකාවට ගෙන ඒම මගින් බන්දුල විතානගේ මුල් නාට්‍යයට මෙන් ම සිංහල නාට්‍යලෝලීන්ටත් යුක්තිය ඉටු කළ බවයි එම නාට්‍යයේ ‘ෂයිලොක්’ චරිතයට පණ දුන් ටෝනි රණසිංහ කියා සිටින්නේ.

‘මම හිටියේ ‘ෂේක්ස්පියර්’ නාට්‍ය නිර්මාණයක රඟ පෑමේ පිපාසයකින්. ඒත් මගේ නාට්‍ය ගුරුවරයා වන සුගතපාල ද සිල්වා පවා ‘ෂේක්ස්පියර්’ නාට්‍ය නිර්මාණ සිංහල වේදිකාවට ආගන්තුක වන බවට මතයකුයි දැරුවේ. බන්දුල විතානගේ ඉන් පසුබට නොවී එම අභියෝගය ජය ගත්තා’ ටෝනි රණසිංහ මෙනෙහි කරයි.

‘බෙකට්’

බන්දුල විතානගේ 1972 වසරේ වේදිකාවට ගෙන ආ ‘බෙකට්’ නාට්‍යයේ ප්‍රධාන චරිත දෙකට පණ දුන් ධර්මසිරි බණ්ඩාරනායක සහ ලූෂන් බුලත්සිංහල බීබීසියට කියා සිටියේ සාර්ථක පරිවර්තන මගින් විශ්ව නාට්‍ය සිංහල වේදිකාවේ රඟ දැක්වීමෙන් දිවියෙන් සමුගත් කලාකරුවා විශිෂ්ට මෙහෙයක් ඉටු කරන ලද බවයි.

‘බන්දුල විතානගේ ශ්‍රී ලංකාව තුළ අනුවර්තන නාට්‍ය කලාවකට පදනම සකස් කළා. සමහරුන් අතර මතයක් පවතිනවා, දේශීය නාට්‍ය කලාවක් ගොඩ නගන්න පුළුවන් ස්වතන්ත්‍ර නාට්‍ය මගින් පමණක්ය කියල. ඒත් බන්දුල විතානගේ කලාකරුවා ෂේක්ස්පියර් ගේ නාට්‍යයක් වුනත් තමන්ගේ අතට ගත්තම ඒක තමන්ගේම නාට්‍යයක් බවට පත්කර ගත් නාට්‍ය ශිල්පියෙක්’ධර්මසිරි බණ්ඩාරනායක පෙන්වා දෙයි.

නාට්‍යයක නළු නිළියන් හැසිරවීමේ දී පවා බන්දුල සුන්දර චරිතයක් වූ බවයි ඔහුගේ ‘බෙකට්’ නාට්‍යයේ දෙවන හෙන්රි රාජ චරිතයට පණ දුන් ලූෂන් බුලත්සිංහල පවසන්නේ.