ක්‍රීඩකයන්ට සහ ක්‍රීඩිකාවන්ට 'ප්‍රථම වරට' සමාන වැටුප්

  • 2017 ඔක්තෝබර් 8
Image copyright Getty Images
Image caption ලෝක පාපන්දු ක්ෂේත්‍රයේ ක්‍රීඩිකාවන් සමාන වැටුප් ලැබූ ප්‍රථම අවස්තාව මෙය විය හැකි බව විශ්වාස කෙරේ

සිය රට නියෝජනය කිරීම වෙනුවෙන් පාපන්දු ක්‍රීඩකයන්ට සහ ක්‍රීඩිකාවන්ට සමාන වැටුප් ගෙවන බව නෝර්වේ පාපන්දු සම්මේලනය නිවේදනය කළේය.

ඒ අනුව මෙතෙක් ක්‍රීඩිකාවන්ට ගෙවනු ලැබූ ක්‍රෝන් මිලියන 3.1 ක මුදල (පවුම් 296,845) මුදල ක්‍රෝන් මිලියන 6 (බ්‍රිතාන්‍ය පවුම් 574,540) දක්වා දෙගුණයකට ආසන්න මුදලකින් ඉහළ දැමීමට නියමිතය.

එයින් ක්‍රෝන් 550,000 ක් (පවුම් 47,875) ලබා දෙන්නේ සහෝදර පාපන්දු ක්‍රීඩකයන් විසිනි.

වෙළෙඳ දැන්වීම්වල පෙනී සිටීම වෙනුවෙන් ක්‍රීඩකයන්ට ලැබෙන ආදායමෙන් ක්‍රීඩිකාවන් සඳහා ඒ මුදල වෙන් කරනු ලැබ තිබේ.

"ක්‍රීඩිකාවන් වෙනුවෙන් මේ පියවර ගැනීම ගැන ස්තුතියි," නෝර්වේ ජාතික පාපන්දු කණ්ඩායමේ ක්‍රීඩිකා කැරලයින් ග්‍රැහැම් හැන්සන් (Caroline Graham Hansen) සඳහන් කළාය.

Image copyright Getty Images
Image caption ඩෙන්මාර්කයේ පාපන්දු ක්‍රීඩිකාවන්ගේ වැටුප් සම්බන්ධ ගැටලුවට තවමත් විසඳුමක් ලැබී නැත

ඉන්ස්ටග්‍රෑම් සමාජ මාධ්‍ය ජාලය ඔස්සේ ක්‍රීඩකයන්ගේ ඡායාරූපයක් පළ කළ කැරලයින් ග්‍රැහැම් හැන්සන්, ඇතැම්විට ක්‍රීඩකයන්ට එය ඉතා සුළු පියවරක් විය හැකි වුවත්, ඔවුන්ගේ වේතනයෙන් ඒ මුදල අඩුවීම නොදැනෙන සුළු ප්‍රමාණයක් විය හැකි වුවත්, "ක්‍රීඩකයන් හා සමානවම ක්‍රීඩාවේ නිරත වුවත්, ක්‍රීඩකයන්ට වඩා අඩුවෙන් වැටුප් ලබන" තමන් ඇතුළු සියලු ක්‍රීඩිකාවන්ට එය ඉතාමත් වැදගත් පියවරක් බව ද සඳහන් කරන්නීය.

"සමාන වැටුප් ලැබීම ඔබ අගය කිරීම මගේ දෑස් තෙත් කරනවා. මට ඔබ සියලු දෙනා වැළඳ ගන්න හිතෙනවා," යනුවෙන් ද ඇය හැඟුම්බරව සටහන් කර තිබුණි.

ලෝක පාපන්දු ක්ෂේත්‍රයේ ක්‍රීඩිකාවන් සමාන වැටුප් ලැබූ ප්‍රථම අවස්තාව මෙය විය හැකි බව නෝර්වේ පාපන්දු ක්‍රීඩක, ක්‍රීඩිකාවන්ගේ සම්මේලනයේ ප්‍රධානී ජෝචිම් වෝල්ටින් (Joachim Walltin) පවසයි.

"නෝර්වේ කියන්නේ සමානාත්මතාව ඉහලින්ම අගය කරන රටක්. ඒ නිසා මේක පාපන්දු ක්‍රීඩාවට වගේම අපේ රට වෙනුවෙනුත් ඉතාමත්ම යහපත් පියවරක්," ඔහු පැවසීය.

සිය වැටුප් සම්බන්ධයෙන් ඩෙන්මාර්ක පාපන්දු සම්මේලනය සමග හටගෙන තිබෙන මතභේදයක් හේතුවෙන් ඩෙන්මාර්කයේ පාපන්දු ක්‍රීඩිකාවෝ පසුගියදා වැඩ වර්ජනයක නිරත වූහ.

අර්බුදය විසඳීම පිණිස සිය වැටුප්වලින් බ්‍රිතාන්‍ය පවුම් 60,000 ක මුදලක් ක්‍රීඩිකාවන්ට ගෙවීමට ඩෙන්මාර්ක පාපන්දු ක්‍රීඩකයෝ යෝජනා කළ නමුත් පාපන්දු බලධාරීහු එය ප්‍රතික්ෂේප කළහ.

ඩෙන්මාර්කයේ පාපන්දු ක්‍රීඩිකාවන්ගේ වැටුප් සම්බන්ධ ගැටලුවට තවමත් විසඳුමක් ලැබී නැත.

සබැඳි විෂයයන්

මේ පුවතට සම්බන්ධ තවත් විස්තර

බීබීසී යෙන්