ජනපති වෙබ් අඩවිය 'හැක් කිරීම': තරුණයෙක් අත්අඩංගුවේ

  • 2016 අගෝස්තු 29
Image copyright President.gov.lk

ශ්‍රී ලංකාවේ ජනාධිපතිවරයාගේ නිල වෙබ් අඩවියට අනවසරයෙන් ඇතුළුවීම හෙවත් 'හැක් කිරීම' සම්බන්ධයෙන් සැකපිට 17 හැවිරිදි පාසල් සිසුවකු කඩුගන්නාවේදී අත්අඩංගුවට ගත් බව පොලිසිය පවසයි.

අත්අඩංගුවට ගනු ලැබූ ශිෂ්‍යයා වැඩිදුර ප්‍රශ්න කිරීම පිණිස කොළඹට රැගෙන එනු ලබන බවත් පොලිස් ප්‍රකාශක නියෝජ්‍ය පොලිස්පති අජිත් රෝහණ බීබීසී සංදේශයට පැවසීය.

ජනාධිපතිවරයාගේ නිල වෙබ් අඩවිය (president.gov.lk) දින දෙකක් ඇතුලත දෙවතාවක් හැක් කිරීමේ අරමුණ කවරක්දැයි ඔහුගෙන් ප්‍රශ්න කිරීමට නියමිත බවත් නියෝජ්‍ය පොලිස්පතිවරයා සඳහන් කළේය.

බ්‍රහස්පතින්දා සවස වෙබ් අඩවිය හැක් කිරීමෙන් අනතුරුව පාසල් ශිෂ්‍යයන් ආණ්ඩුවට කරන ඉල්ලීමක් මෙන්ම ජනාධිපති මෛත්‍රීපාල සිරිසේන සහ අගමැති රනිල් වික්‍රමසිංහ වෙත නිකුත් කෙරුණු උපදෙස් කිහිපයක්ද 'හැකරුන්' විසින් සිංහල භාෂාවෙන් එහි ප්‍රකාශයට පත් කර තිබුණි.

පැය කිහිපයක් ඇතුලත වෙබ් අඩවිය යථා තත්වයට පත්කරන ලද නමුත් යළිත් වරක් සිකුරාදාත් හැකරුන් එහි ඇතුල්වීම හේතුවෙන් තාවකාලිකව වසා දැමුණු වෙබ් අඩවිය ඉරිදා යළි විවෘත කෙරිණ.

පරිගණක සම්බන්ධ චෝදනා පිළිබඳව කටයුතු කරන නීති විධිවිධාන ප්‍රකාර සැකකරුට එරෙහිව නීතිමය පියවර ගැනීමට නියමිත බවත් නියෝජ්‍ය පොලිස්පති අජිත් රෝහණ සංදේශයට පැවසීය.

මීට ඉහතදීත් වෙබ් අඩවි ගණනාවක අනවසරයෙන් ඇතුළුවීම පිළිබඳව සැකකාර පාසල් ශිෂ්‍යයාට චෝදනා එල්ල වී තිබෙන බවත් සංදේශයට වාර්තා වේ.

බීබීසී යෙන්