ටිරාන් අලස් රිමාන්ඩ් !

  • 2016 නොවැම්බර් 2
Image copyright Getty Images
Image caption ටිරාන් අලස්

පොදු දේපල පනත යටතේ චෝදනා ලැබ සිටින හිටපු පාර්ලිමේන්තු මන්ත්‍රී ටිරාන් අලස් ඇතුළු විත්තිකරුවන් තුන්දෙනකු රක්ෂිත බන්ධනාගාරගත කරන මෙන් කොළඹ මහාධිකරණය නියෝග කළේය.

සුනාමියෙන් පීඩාවට පත් උතුරු පළාතේ ජනතාවට නිවාස ඉදිකිරීම සඳහා පසුගිය පාලන සමයේ උතුරු - නැගෙනහිර ප්‍රතිසංස්කරණ හා සංවර්ධන (රාඩා) ආයතනය හරහා වෙන්කරන ලද රුපියල් විසිකෝටියක පමණ මුදලක් සාවද්‍ය ලෙස පරිහරණය කළ බවටයි ටිරාන් අලස් ඇතුළු විත්තිකරුවන් හතර දෙනෙකුට එරෙහිව නීතිපතිවරයා විසින් නඩු පවරනු ලැබ තිබෙන්නේ.

එම නඩුවට අදාළ චෝදනා පත්‍ර විත්තිකරුවන්ට භාරදීම කොළඹ මහාධිකරණය හමුවේ සිදුවිය.

චූදිත ටිරාන් අලස් වෙනුවෙන් පෙනීසිටි නීතිවේදියා ඉන් අනතුරුව අධිකරණයෙන් ඉල්ලීමක් කරමින් සිය සේවාදායකයා දැඩි හෘදරෝගී තත්වයකින් පසුවන බව කියා සිටියේය.

එවැනි තත්වයක් යටතේ සිය සේවාදායකයා රක්ෂිත බන්ධනාගාරගත කළහොත් ඔහුගේ ජීවිතයට අනතුරක් සිදුවිය හැකිබව කියා සිටි නීතිවේදියා අදාළ වෛද්‍ය වාර්තා කීපයක්ද අධිකරණයට ඉදිරිපත් කළේය.

එහෙත් එම ඉල්ලීමට විරෝධය පළකළ රජයේ නීතිවේදියා, රෝගී විත්තිකරුවන්ට බන්ධනාගාරය තුළ ප්‍රතිකාර ලබාගැනීමේ පහසුකම් පවතින බවයි ප්‍රකාශ කළේ.

එබැවින් විත්තිකරුවන්ගේ රෝගී තත්වය පිළිබඳව අධිකරණ වෛද්‍ය නිලධාරියා මගින් විධිමත් වාර්තාවක් ලබාගන්නා තෙක් විත්තිකරුවන් රිමාන්ඩ් භාරයට පත් කරන ලෙසයි රජයේ නීතිවේදියා ඉල්ලා සිටියේ.

එම ඉල්ලීම පිළිගනිමින් ටිරාන් අලස් ඇතුළු විත්තිකරුවන් තුන්දෙනා ලබන දහවෙනි දිනතෙක් රිමාන්ඩ් භාරයේ තැබීමට කොළඹ මහාධිකරණ විනිසුරු කුසලා සරෝජිනී වීරවර්ධන නියෝග කළාය.

මෙම නඩුවේ විත්තිකරුවෙකු ලෙස නම්කරනු ලැබ සිටින ඇන්තනි එමිල්කාන්තන් නැමැත්තා අධිකරණය මගහැර සිටින අතර ඔහු වෙනුවෙන් නීතිවේදියෙක් අධිකරණය ඉදිරියේ පෙනී සිටියේය.

මේ පුවතට සම්බන්ධ තවත් විස්තර