'ලොකුම නත්තල් ගසේ' ඉදිකිරීම් යළි ඇරඹේ

  • 2016 දෙසැම්බර් 12
Image copyright Reuters

කොළඹ ගාලු මුවදොර පිටියේ ලොව විශාලතම නත්තල ගස ඉදිකිරීමේ කටයුතු යළි ආරම්භ කළ බව සංවිධායක කමිටුව පවසයි.

අගමැති රනිල් වික්‍රමසිංහ සහ මුදල් අමාත්‍ය රවි කරුණානායක, මැල්කම් කාදිනල් රංජිත් කොළඹ අගරදගුරු හිමියන් මුණ ගැසී සාකච්ඡා කිරීමෙන් අනතුරුව නත්තල් ගස යළි ඉදිකිරීමට තීරණය කර තිබෙන බවත් සංවිධායක කමිටුව නිකුත් කළ නිවේදනයක දැක්වේ.

සාකච්ඡාවෙන් අනතුරුව නත්තල් ගස ඉදිකිරීමේ කටයුතු යළිත් ආරම්භ කරන මෙන් අගමැතිවරයා විසින් වරාය සහ නාවික කටයුතු පිළිබඳ අමාත්‍ය අර්ජුණ රණතුංග වෙත දැනුම් දෙනු ලැබූ බවත් නත්තල් ගස ඉදිකිරීමේ කමිටුවේ සභාපති මංගල ගුණසේකර මාධ්‍යවේදීන් හමුවේ පැවසීය.

පසුගිය දෙසැම්බර් 06 වැනි දින කොළඹදී මාධ්‍ය හමුවක් ඇමතූ මැල්කම් කාදිනල් රංජිත් හිමිපාණෝ, ලොව උසම නත්තල් ගස ඉදිකිරීමේ ව්‍යාපෘතිය මුදල් නාස්තියක් බව සඳහන් කළහ.

දිළිඳු ජනතාව වෙනුවෙන් නිවාස තනාදීමට හෝ දිළිඳු පවුල්වල දරුවන්ට ශිෂ්‍යත්ව ලබාදීම පිණිස මෙම මුදල් යොදවන ලෙස උන්වහන්සේ එහිදී ඉල්ලීමක් කළහ.

ඉන් අනතුරුව නත්තල් ගස ඉදිකිරීමේ ව්‍යාපෘතිය නවතා දැමීමට අර්ජුණ රණතුංග අමාත්‍යවරයා නියෝග කළ නමුත්, කතෝලික භක්තිකයන් ඇතුළු බොහෝ දෙනා කාදිනල් හිමියන්ගේ එම අදහස සමාජ මාධ්‍ය ජාල ඔස්සේ දැඩි විවේචනයට ලක් කර තිබුණි.

අදාළ ව්‍යාපෘතිය සඳහා රජයේ අරමුදල් යොදගන්නා බවට 'කිසියම් පිරිසක්' කාදිනල් හිමියන්ට වැරදි තොරතුරු ලබා දී ඇති බව සංවිධායක කමිටුවේ ප්‍රධානියා වැඩිදුරටත් සඳහන් කළේය.

මීට පෙරාතුව සැලසුම් කළ පරිදිම නත්තල් ගස ලබන සතියේ විවෘත කිරීමට කටයුතු යොදා තිබේ.

මේ පුවතට සම්බන්ධ තවත් විස්තර