ජාතික ලැයිස්තුව: අමාත්‍ය සරත් ෆොන්සේකාට නොතීසි

  • 2017 මැයි 17
අමාත්‍ය ෆොන්සේකා Image copyright Getty Images

ග්‍රාමීය කර්මාන්ත සංවර්ධන අමාත්‍ය, ෆීල්ඩ් මාෂල් සරත් ෆොන්සේකාගේ පාර්ලිමේන්තු මන්ත්‍රී ධුරය අහෝසි කිරීමේ නියෝගයක් නිකුත් කරන්නැයි ඉල්ලා ගොනුකළ පෙත්සමක් සලකා බැලීමට ශ්‍රේෂ්ඨාධිකරණය තීන්දු කළේය.

හිටපු දකුණු පළාත් සභා මන්ත්‍රී නීතිවේදී මේජර් අජිත් ප්‍රසන්න විසින් පෙත්සම ඉදිරිපත් කර තිබිණ.

මන්ත්‍රී ධුරය සදහා පත්වීම ලබන විට සරත් ෆොන්සේකා ඇමතිවරයා එක්සත් ජාතික පක්ෂයේ සාමාජිකත්වය ලබා නොසිටි බව පවසන පෙත්සම්කරු, එක්සත් ජාතික පක්ෂයේ සාමාජිකයෙකු නොවන පුද්ගලයෙකු එම පක්ෂයේ ජාතික ලැයිස්තු මන්ත්‍රීවරයෙකු ලෙස පාර්ලිමේන්තුවට පත්කිරීම ව්‍යවස්ථා විරෝධී බව සිය පෙත්සමේ සඳහන් කරයි.

එබැවින් ෆීල්ඩ් මාෂල්වරයාගේ මන්ත්‍රී ධුරය අහෝසි කිරීමේ නියෝගයක් නිකුත් කරන මෙන් පෙත්සම්කරු ශ්‍රේෂ්ඨාධිකරණයෙන් ඉල්ලා සිටියි.

පෙත්සම කැඳ වූ අවස්ථාවේ මූලික විරෝධතාවක් මතුකළ නීතිපතිවරයා පෙත්සම විභාගයට නොගෙන ප්‍රතික්ෂේප කරන්නැයි අධිකරණයෙන් ඉල්ලීමක් කළේය.

එහෙත් පෙත්සම සලකා බැලීමට ඉඩදෙන බව ශ්‍රේෂ්ඨාධිකරණයේ නිගමණය විය.

ඒ අනුව ලබන ජූලි මස 12 වෙනි දින පෙත්සම සලකා බලන බව ප්‍රකාශ කළ අධිකරණය එදිනට අධිකරණයේ පෙනී සිටින මෙන් සරත් ෆොන්සේකා අමාත්‍යවරයා ඇතුළු වග උත්තරකරුවන් වෙත නොතිසි යවන මෙන්ද පෙත්සම්කාර පාර්ශවයට දැනුම් දුන්නේය.