බිලි පූජාවට සතුන් ගෙනාවොත් මගේ භාරයට ගන්නවා - අමාත්‍ය මර්වින්

අවසාන යාවත්කාලීන කිරීම :  2012 අගෝස්තු 24 සිකුරාදා - 15:24 GMT
Minister Mervyn Silva

සත්ත්ව හිංසනයට එරෙහිව මහා සත්‍ය ක්‍රියාවක් කාලි දේවස්ථානය ඉදිරිපස පැවැත්වීමට කටයුතු කොට තිබෙන බව ඇමතිවරයා පවසයි

ඓතිහාසික හලාවත මුන්නේස්වරම කාලි දේවස්ථානයේ බිලි පූජාව සඳහා සතුන් රැගෙන ආවොත් එම සතුන් තම භාරයට ගන්නා බව මහජන සම්බන්ධතා අමාත්‍ය මර්වින් සිල්වා පවසයි.

ලබන සැප්තැම්බර් පළමු වැනි දින ආරම්භ වීමට නියමිත බිලි පූජාවේදී සිදුවන සත්ත්ව හිංසාව වැළැක්වීමට මැදිහත් වන මෙන් බොහෝ දෙනා ගෙන් තමන්ට ඉල්ලීම් ලැබී තිබෙන බවයි, ඇමතිවරයා පවසන්නේ.

එබැවින් ඒ සඳහා සතුන් ගෙන එමෙන් වලකින මෙන් ඇමතිවරයා ජනතාව ගෙන් ඉල්ලීමක් කළේ කොළඹ පැවති මාධ්‍ය හමුවකදී.

මෙවැනි බලපෑම් මඟින් කිසියම් ජන කොට්ඨාශයක ආගම ඇදහීමේ ප්‍රජාතන්ත්‍රවාදී අයිතිය අහිමිවන්නේ නොවේදැයි විමසූ විට අමාත්‍ය මර්වින් සිල්වා එය ප්‍රතික්ෂේප කළ බවයි, කේ එස් උදයකුමාර් බීබීසී සංදේශයට වාර්තා කරන්නේ.

"අපි තරු පහේ ප්‍රජාතන්ත්‍රවාදයෙන් පොඩ්ඩක් අයින් වෙන්න ඕන. දැන් ඔය කොටිය රජ කරන කාලේ උතුරට පෙළපාලි ගියෙත් නෑ, නැගෙනහිරට පෙළපාලි ගියෙත් නෑ, පාරේ පෙළපාලි ගියෙත් නෑ බෝම්බවලට බයේ හැංගිලා හිටියේ මහා වීරයෝ," යන්න ඒ ප්‍රශ්නයට ඇමතිවරයා පළ කළ ප්‍රතිචාරයයි.

ආණ්ඩුව විසින් "රට නිදහස් කොට දුන්" පසුව තම "වීරත්වය වීරවරයන් ලෙසින්" භාවිතා කරන මෙන්ද ඇමතිවරයා ඉල්ලා සිටියේය.

මෙම ඉල්ලීමට කෝවිලේ පූජකවරුන් අවනත නොවන්නේ නම් ගන්නා පියවර මේ මොහොතේ හෙළි කළ නොහැකි බව පැවසූ ඇමතිවරයා, සත්ත්ව හිංසනයට එරෙහිව මහා සත්‍ය ක්‍රියාවක් ලබන මස පළමු වැනි දින කාලි දේවස්ථානය ඉදිරිපස පැවැත්වීමට කටයුතු කොට තිබෙන බවට ද මාධ්‍යවේදීන්ට දැනුම් දුන්නේය.

වැඩි තොරතුරු සඳහා

BBC © 2014 බීබීසී නොවන වෙබ් අඩවිවල අන්තර්ගතය පිළිබඳව බීබීසීය වගකීමෙන් නොබැඳේ

මෙම වෙබ් අඩවිය හොඳින්ම කියවිය හැක්කේ style sheets (CSS) ක්‍රියාත්මක කොට තිබෙන අලුත්ම වෙබ් බ්‍රවුසරයක් හරහාය. ඔබේ වත්මන් වෙබ් බ්‍රවුසරය මඟින් ඔබට මේ වෙබ් අඩවිය කියවිය හැකිමුත් එහි අඩංගු සියලු අංග පැහැදිලිව නැරඹීමට ඔබට අවස්ථාව නොලැබෙනු ඇත. ඔබේ වෙබ් බ්‍රවුසරයේ මෘදුකාංග යාවත්කාලින කිරීම හෝ ඔබට හැකිනම්  style sheets (CSS) ක්‍රියාත්මක කිරීම පිළිබඳව සලකා බලන්න.