රාජපක්ෂ පුතුන් කොටස් වෙළඳ පොලේ 'ප්‍රධාන පෙලේ ආයෝජකයන්'

අවසාන යාවත්කාලීන කිරීම :  2012 නොවැම්බර් 19 සඳුදා - 13:30 GMT
Colombo Stock Exchange (file photo)

මෙසේ ආයෝජනය කරන්නේ චීනයෙන් "ගිනි පොලියට" ලබාගන්නා ණය මුදල් වෙනුවෙන් ලැබෙන "මහා පරිමාණ කොමිස් කුට්ටි" වලින් බව එජාපය චෝදනා කරයි

මහජන මුදලින් වැටුප් ලබන යොවුන් පාර්ලිමේන්තු මන්ත්‍රීවරයකු සහ නාවුක හමුදා භටයකු ශ්‍රී ලංකා කොටස් වෙළඳ පොලේ ආයෝජනය කරන සමාගම්වල ප්‍රධාන පෙලේ ආයෝජකයන් වූයේ කෙසේදැයි විරුද්ධ පක්ෂය ප්‍රශ්න කරයි.

එක්සත් ජාතික පක්ෂයේ මාධ්‍ය අංශ ප්‍රධානී මංගල සමරවීර මන්ත්‍රීවරයා එම ප්‍රශ්නය මතු කළේ ශ්‍රී ලංකා ආණ්ඩුවේ ඉහල පෙලේ බලධාරීන්ගේ වංචා දූෂණ සම්බන්ධයෙන් ඔහු පසුගියදා පාර්ලිමේන්තුවේදී කළ විශේෂ ප්‍රකාශයක් පිළිබඳව බීබීසී සංදේශය සමඟ අදහස් දක්වමින්.

"මේ අයට මේ මුදල් කොහෙන්ද ලැබෙන්නේ, මේ මුදල් කාගේද කියන එක තමයි අද මේ රටේ සියලු දෙනා කථා වෙන්නේ," ඔහු පැවසීය.

ජනාධිපති මහින්ද රාජපක්ෂ ගේ පවුලේ සාමාජිකයන් කොටස් වෙළඳ පොලේ මෙසේ ආයෝජනය කරන්නේ චීනයෙන් "ගිනි පොලියට" ලබාගන්නා ණය මුදල් වෙනුවෙන් "මහා පරිමාණයේ කොමිස් කුට්ටි" ලැබෙන තත්ත්වයක් තුල බවයි, රාජපක්ෂ ආණ්ඩුවේ පළමු විදේශ අමාත්‍යවරයා ද වූ සමරවීර මන්ත්‍රීවරයා පවසන්නේ.

ශ්‍රී ලංකා ආණ්ඩුව මීට කලින්ද විදේශ රටවලින් ණය ලබාගෙන තිබෙන අතරම, තමන් සාමාජිකත්වය දැරූ ආණ්ඩුවල සාමාජිකයන්ද කොමිස් ලබාගන්නට ඇති නමුත් මේ ආකාරයෙන් "සැලසුම් සහගතව ගිනි පොලියට ණය" ලබාගත් යුගයක් මින් පෙර නොවූ බවයි ඔහු පවසන්නේ.

කෙසේ නමුත් එම චෝදනාව ප්‍රතික්ෂේප කරන කැබිනට් ප්‍රකාශක කෙහෙළිය රඹුක්වැල්ල ඇමතිවරයා පවසන්නේ විදේශීය ආයෝජනයන් හෝ ණය මුදල් ලබා ගැනීම එක පුද්ගලයෙකුගේ තීන්දුවක් නොව සාමූහික ව්‍යායාමයක ප්‍රතිඵලයක් බවයි.

වත්මන් ආණ්ඩුවේ කිසිදු සාමාජිකයකු කිසිදු අවස්ථාවක කිසිම කොමිස් මුදලක් ලබා ගෙන නැතැයි සහතිකයක් දීමට තමාට හැකියාවක් නොමැති බවද අමාත්‍ය රඹුක්වැල්ල පිළි ගත්තේය.

වැඩි තොරතුරු සඳහා

BBC © 2014 බීබීසී නොවන වෙබ් අඩවිවල අන්තර්ගතය පිළිබඳව බීබීසීය වගකීමෙන් නොබැඳේ

මෙම වෙබ් අඩවිය හොඳින්ම කියවිය හැක්කේ style sheets (CSS) ක්‍රියාත්මක කොට තිබෙන අලුත්ම වෙබ් බ්‍රවුසරයක් හරහාය. ඔබේ වත්මන් වෙබ් බ්‍රවුසරය මඟින් ඔබට මේ වෙබ් අඩවිය කියවිය හැකිමුත් එහි අඩංගු සියලු අංග පැහැදිලිව නැරඹීමට ඔබට අවස්ථාව නොලැබෙනු ඇත. ඔබේ වෙබ් බ්‍රවුසරයේ මෘදුකාංග යාවත්කාලින කිරීම හෝ ඔබට හැකිනම්  style sheets (CSS) ක්‍රියාත්මක කිරීම පිළිබඳව සලකා බලන්න.