වීරකැටියේ ක්‍රිස්තියානි දේවස්ථානයකට ප්‍රහාරයක්

අවසාන යාවත්කාලීන කිරීම :  2012 දෙසැම්බර් 10 සඳුදා - 15:25 GMT

වීරකැටියේ ජීවනාලෝක සභාවේ උදෑසන දේව මෙහෙය පැවැත්වුණු අවස්ථාවේ එහි කඩා වැදුණු බෞද්ධ භික්ෂූන් වහන්සේ ඇතුළු විශාල පිරිසක් දේවස්ථානයට ප්‍රහාරයක් එල්ල කළ බව ජාතික ක්‍රිස්තියානි ධර්මධාන සන්ධානය පවසයි.

ඉරිදා උදෑසන එල්ල වූ මෙම ප්‍රහාරයේදී දේවස්ථානයට මෙන්ම දේවස්ථානයට පිටින් නවතා තිබුණු වාහනවලටද බරපතල අලාභ හානි සිදුවූ බව ජාතික ක්‍රිස්තියානි ධර්මධාන සන්ධානයේ ප්‍රකාශිකාවක් බීබීසී සංදේශයට කියා සිටියාය.

සිය බැතිමතුන් කිහිප දෙනකු උද්ඝෝෂණයට එක්ව සිටි පිරිසගේ ප්‍රහාරයට ලක්වූ අතර එය පාලනය කිරීම සඳහා පොලීසිය පමණක් නොව හමුදාව පවා යෙදවීමට බලධාරීන්ට සිදුවූ බවද ඇය පවසන්නීය.

"එහෙම වෙන ආගමක නායකයන්ගෙන් අවසර ගන්න කියල ලංකාවේ නීතියේ නැහැ. ලංකාවේ ව්‍යවස්ථාව අනුව ඕනෑම කෙනෙකුට තමන්ගේ ආගම ඇදහීමට අයිතිය තියෙනවා"

ජාතික ක්‍රිස්තියානි ධර්මධාන සන්ධානයේ ප්‍රකාශිකාව

සිය දේවස්ථානය කුඩු කර දමන බවට ඊට පෙර දින එල්ලවූ තර්ජනයකින් අනතුරුව පොලිස් භටයන් කිහිප දෙනකු එහි සේවයේ යොදවා සිටියත් දහසකට අධික පිරිසක් උද්ඝෝෂණයට එක්ව සිටි බැවින් ඔවුන් පාලනය කර ගැනීමට පොලීසියට නොහැකි වූ බවයි, ප්‍රකාශිකාව පවසන්නේ.

ප්‍රදේශයේ බෞද්ධ භික්ෂූන් වහන්සේගේ අනුමැතියකින් තොරව එම ස්ථානයේ ක්‍රිස්තියානි දේවස්ථානයක් පවත්වාගෙන යාමට අවසර දිය නොහැකි බවට සෙනසුරාදා සභා පාලකවරයාට තර්ජන කොට ඇති බව පවසන ජාතික ක්‍රිස්තියානි ධර්මධාන සන්ධානය, එය ශ්‍රී ලංකාවේ නීතියට පටහැනි බවද සඳහන් කරයි.

"එහෙම වෙන ආගමක නායකයන්ගෙන් අවසර ගන්න කියල ලංකාවේ නීතියේ නැහැ. ලංකාවේ ව්‍යවස්ථාව අනුව ඕනෑම කෙනෙකුට තමන්ගේ ආගම ඇදහීමට අයිතිය තියෙනවා," යයි ද ප්‍රකාශිකාව සඳහන් කළාය.

කෙසේ නමුත් බලහත්කාරයෙන් බෞද්ධ බැතිමතුන් ක්‍රිස්තියානි ආගමට බඳවා ගන්නා බවට තම නිකායට කෙරෙන චෝදනාවල කිසිදු සත්‍යයක් නොමැති බවයි, ඇය පවසන්නේ.

1952 දී ශ්‍රී ලංකාවේ ස්ථාපිත කරන ලද ජාතික ක්‍රිස්තියානි ධර්මධාන සන්ධානයේ දේවස්ථාන 74 ක් ශ්‍රී ලංකාව පුරා පිහිටා තිබෙන අතර, තමන් ලක්ෂ දෙකකට අධික ඉවැන්ජලිකල් ක්‍රිස්තියානි බැතිමතුන් නියෝජනය කරන බවයි සන්ධානය පවසන්නේ.

BBC © 2014 බීබීසී නොවන වෙබ් අඩවිවල අන්තර්ගතය පිළිබඳව බීබීසීය වගකීමෙන් නොබැඳේ

මෙම වෙබ් අඩවිය හොඳින්ම කියවිය හැක්කේ style sheets (CSS) ක්‍රියාත්මක කොට තිබෙන අලුත්ම වෙබ් බ්‍රවුසරයක් හරහාය. ඔබේ වත්මන් වෙබ් බ්‍රවුසරය මඟින් ඔබට මේ වෙබ් අඩවිය කියවිය හැකිමුත් එහි අඩංගු සියලු අංග පැහැදිලිව නැරඹීමට ඔබට අවස්ථාව නොලැබෙනු ඇත. ඔබේ වෙබ් බ්‍රවුසරයේ මෘදුකාංග යාවත්කාලින කිරීම හෝ ඔබට හැකිනම්  style sheets (CSS) ක්‍රියාත්මක කිරීම පිළිබඳව සලකා බලන්න.