වැලිවේරිය: කට උත්තර ගැනීමට 'ජනතාව හමුදා කඳවුරට කැඳවලා'

  • 16 අගෝස්තු 2013
Military in Weliweriya (file photo)
Image caption ප්‍රදේශවාසීන්ගෙන් කට උත්තර ගැනීමට හමුදාවට නීත්‍යානුකූල බලයක් නැති බව මානව හිමිකම් කොමිසම පවසයි

පසුගිය අගෝස්තු පළමුවෙනි දින හමුදා ප්‍රහාරයට ලක් වූ වැලිවේරියේ රතුපස්වල ජනතාව හමුදා කඳවුරුවලට කැඳවා කට උත්තර ගැනීමට හමුදාව විසින් දරන ලද උත්සාහයක් තමන් මැදිහත් වී වලක්වන ලද බව ශ්‍රී ලංකා ජාතික මානව හිමිකම් කොමිසම පවසයි.

එවැනි පරීක්ෂණ පැවැත්වීමට නීත්‍යානුකූල අයිතියක් තිබෙන්නේ පොලිසියට පමණක් බව ද මානව හිමිකම් කොමිසමේ කොමසාරිස් ආචාර්ය ප්‍රතිභා මහානාමහේවා බීබීසී දෙමළ සේවයේ ජයප්‍රගාෂ් නල්ලුසාමිට කියා සිටියේය.

කෙසේ නමුත්, හමුදා නිලධාරීන් වැලිවේරියට ගොස් ප්‍රදේශයේ කතෝලික දේවගැති තුමා ඇතුළු පිරිසකගෙන් මේ වනවිටත් කට උත්තර සටහන් කරගෙන තිබෙන බව ප්‍රදේශවාසීහු සංදේශයට පැවසූහ.

'බරපතල තත්වයක් මතුවෙලා'

Image caption ජනතාව හමුදා කඳවුරුවලට කැඳවීම 'තර්ජනයක්' - නිදහස් මාධ්ය් ව්‍යාපාරය

වැලිවේරියේදී මාධ්‍යවේදීන්ට එල්ල වූ ප්‍රහාර සම්බන්ධයෙන් සාකච්ඡා කිරීම පිණිස බ්‍රහස්පතින්දා මානව හිමිකම් කොමිසමට පැමිණෙන මෙන් නිදහස් මාධ්‍ය ව්‍යාපාරයට ද කැඳවීමක් කර තිබුණු නමුත් හදිසියේම එය කල් දමන ලද බව එහි ගිය විට තමන්ට දැනුම් දුන් බවයි, එහි කැඳවුම්කරු සුනිල් ජයසේකර බීබීසී සංදේශයට කියා සිටියේ.

රතුපස්වල ගම්වාසීන්ට එල්ල වූ ප්‍රහාරය සම්බන්ධයෙන් 'බරපතල තත්වයක්' මතු වී ඇති නිසා එයට මැදිහත්වීමට කොමිසමට සිදු වී තිබෙන බව එහිදී තමන්ට දැනුම් දෙනු ලැබූ බව ඔහු පැවසීය.

ප්‍රහාරය සම්බන්ධයෙන් යුද හමුදාව පවත්වන පරීක්ෂණය වෙනුවෙන් සාක්ෂි දීමට ප්‍රදේශවාසීන් කැමති නම්, ස්වේච්ඡාවෙන් ඉදිරිපත් වන්නන් පමණක් ඒ සඳහා කැඳවීමේ වරදක් නැති බව නිදහස් මාධ්‍ය ව්‍යාපාරය අවධාරණය කරයි.

පොලිසියේ කාර්ය භාරයට හමුදාව මැදිහත්වීම වැලිවේරිය ප්‍රහාරයට ගොදුරු වූජනතාවට සහ මාධ්‍යවේදීන්ට කෙරෙන තර්ජනයක් බවයි, සුනිල් ජයසේකර පවසන්නේ.

හමුදාවේ ක්‍රියා කලාපය පිළිබඳව ප්‍රදේශවාසීන් පැමිණිලි කිරීමෙන් අනතුරුව, සිද්ධිට සම්බන්ධයෙන් ප්‍රදේශවාසීන් ගෙන් කට උත්තර ලබා ගැනීම ලබන ඉරිදා වැලිවේරිය පොලිසියේදී සිදු කිරීමට කටයුතු සම්පාදන කළ බවයි, ආචාර්ය ප්‍රතිභා මහානාමහේවා වැඩිදුරටත් කියා සිටියේ.

මානව හිමිකම් කොමිසම මේ වන විට රාජ්‍ය ආයතන 26 ක් ඇතුළු පිරිසක ගෙන් කරුණු විමසා තිබෙන බව පවසන ඔහු, හමුදාවේ සහ පොලිසියේ වාර්තා ද ලැබීමෙන් අනතුරුව කොමිසමේ පරීක්ෂණ වාර්තාව ඉදිරි සති දෙක, තුන ඇතුලත ප්‍රකාශයට පත් කිරීම හැකි වනු ඇතැයි බලාපොරොත්තු පළ කළේය.

මේ පිළිබඳව හමුදාවෙන් කරුණු විමසීමට සංදේශය දැරූ උත්සාහය සාර්ථක නොවීය.

මේ පුවතට සම්බන්ධ තවත් විස්තර