ඔබේ දුරකථනයේ හෝ පරිගණකයේ මෙය වාදනය කිරීමට අදාළ මෘදුකාංග නැත

මහනුවර කාර් රේස්: මහජන අදහස්

මහනුවර නගර මධ්‍යයේ පැවැත්වීමට නියමිත මෝටර් රථ ධාවන සැණකෙළිය සම්බන්ධයෙන් මහජනතාව අතර විවිධ මත පවතී.

බී.බී.සී සංදේශය වෙනුවෙන් ප්‍රසාද් පූර්නිමාල් ජයමාන්න, මහනුවර නගරවාසීන් අතරට ගොස් කරන ලද විමසුමකදී ලද අදහස් තුළිනුයි ඒ බව අනාවරණය වන්නේ.

"කාර් රේස් ඇත්ත වශයෙන්ම මේ වගේ තැනකට උචිත නැහැ. එකක් තමයි මේක පූජනීය නගරයක්. අනෙක් කරුණ තමයි භූගෝලීය වශයෙන් බැලුවොත් කඳු පල්ලම් තියන ඉතා පුංචි නගරයක්, ලෝක උරුම ගොඩනැගිලි තියනවා. ඒ නිසා මේ පටු මාර්ග වල අධික වේගයෙන් මෝටර් රථ ධාවනය කිරීම සුදුසු නැහැ" ශ්‍රී දළදා මාලිගාව අබියස දී හමු වූ ඒ.සි.නෙත්තිකුමාර සංදේශයට ප්‍රකාශ කළේය.

තම විරෝධය පළ කළ ස්ටැන්ලි පෙරේරා කියා සිටියේ ධනවත් රටවල් වලට ඔබින කාර් රේස් මහනුවරට අවශ්‍ය නොවන බවයි.

මාළිගාව ළඟ සෙල්ලම් එපා

"ශ්‍රී දළදා මාලිගාව අබියස සෙල්ලම් කරන්න ඕන නැහැ. අපේ ශ්‍රී දන්ත ධාතුත් වහන්සේ ඔක්කොටම වැඩිය උතුම්. ඒ නිසා කාර් රේස් වලට මම කැමති නැහැ"ලලිතා බණ්ඩාර පවසන්නීය.

ප්‍රසාද් පූර්නිමාල් ජයමාන්නට හමු වූ පූජ්‍ය මහින්ද හිමියන් කියා සිටියේ ජාතිය, ආගම වෙනුවෙන් කතා කළ, වැඩ කළ සියලු දෙනා නිශ්ශබ්ද කරන බලවේගයක් මේ පිටුපස ඇති බවට තමන් විශ්වාස කරන අතර රාජ්‍ය පාලකයන් මහා නායක හිමිවරුන්ගේ අවවාද වලට ඇහුම්කන් දිය යුතුව ඇති බවයි.

"පාරක යන්නත් නැහැ, වෙළදාමක් කරන්නත්නැහැ, මගීන්ට යන්න වෙලා තියෙන්නේ මහ පාරෙන් ඉවත් වෙලා" මෝටර් රථ ධාවන තරඟ වලට අප්‍රසාදය පළ කිරීමට හේතු පැහැදිලි කරන පදික වේදිකා වෙළෙන්දකු වන දිනුක ප්‍රනාන්දු තම අදහස් පළ කළේය.

එහෙත් මෝටර් රථ ධාවන තරඟ නුවර පැවැත්වීම ගැන සතුටු වෙන බවයි චානක කුලතුංග පවසන්නේ. ඔහු කියා සිටියේ මහනුවර මෝටර් රථ ධාවන තරඟ පැවැත්වුවොත් එවැනි තරඟ නැරඹීමට කොළඹට යාමට සිදු නොවන නිසා තමන් එම වැඩ පිළිවෙලට සතුටු බවයි.