ගාසා ප්‍රහාරවලට එරෙහිව නැගෙනහිර උද්ඝෝෂණ

රට පුරා වෙසෙන මුස්ලිම් ජනතාව රාමසාන් උත්සවය සමරන අතරතුර නැගෙනහිර පළාතේ මුස්ලිම් ජාතිකයෝ ඊශ්‍රායලය විසින් ගාසා තීරය වෙත එල්ල කෙරෙන ප්‍රහාර හෙලා දකිමින් ඊට විරෝධය පල කර උද්ඝෝෂණයේ යෙදෙති.

මඩකලපුව දිස්ත්‍රික්කයේ කාත්තන්කුඩි ප්‍රදේශයේ හා අම්පාර දිස්ත්‍රික්කයේ අඩ්ඩලචේනෙයි ප්‍රදේශයේ පවත්වන ලද උද්ඝෝෂණ සඳහා මුස්ලිම් ජාතිකයෝ විශාල පිරිසක් සහභාගී වුහ.

ඊශ්‍රායල ප්‍රහාරවලට විරෝධය පාමින් මුස්ලිම් විරෝධතාකරුවන් විසින් ඇමරිකාවේ හා ඊශ්‍රායලයේ ජාතික ධජ ගිනි තබා තිබේ.

විරෝධතාකරුවෝ ඊශ්‍රායල ප්‍රහාරයන්ට හසුව මරණයට පත් දරුවන්ගේ ඡායාරූප සහිත පුවරු අතින් ගෙන ඊශ්‍රායල ප්‍රහාරවලට ඔවුන්ගේ විරෝධය පල කළහ.

රාමසාන් විශේෂ යාච්ඤාව සඳහා මුස්ලිම් පල්ලිවලට එක් වූ මුස්ලිම් ජාතිකයන් ආගමික කටයුතු අවසාන කිරීමෙන් අනතුරුවයි වීදි බැස උද්ඝෝෂණයේ යෙදී තිබෙන්නේ.

ඇමරිකාව හා ඊශ්‍රායලයට විරුද්ධ, පලස්තීනයට පක්ෂ සටන් පාඨ කියමින් ‘යුද්ධය නතර කර මුස්ලිම් ජනතාවට ආධාර කිරීමට ජාත්‍යන්තරය ඉදිරිපත් විය යුතුයි’ යන්න නැගෙනහිර මුස්ලිම් ජනතාව අවධාරණය කර සිටිති.

මේ පුවතට සම්බන්ධ තවත් විස්තර