ඔබේ දුරකථනයේ හෝ පරිගණකයේ මෙය වාදනය කිරීමට අදාළ මෘදුකාංග නැත

මම ආපහු යනවා - සුනන්ද

ජීවිත තර්ජන හමුවේ විදේශගත වූ මාධ්‍යවේදීන්ට යළි සියරට එන මෙන් නව ආණ්ඩුව පොදුවේ කළ ආරාධනය පිළිගෙන යළිත් මවුබිම කරා පැමිණෙන බව ජිනීවා නුවරට පිටුවහල්ව සිටින මාධ්‍යවේදී සුනන්ද දේශප්‍රිය ප්‍රකාශ කරයි.

මෛත්‍රීපාල සිරිසේන ජනාධිපතිවරයාගේ පරිපාලනය මාධ්‍යවේදීන්ට එරෙහිව මර්දනකාරී පියවරක් අනුගමනය නොකරනු ඇතැයි යන විශ්වාසය මත වසර පහක් පිටුවහල්ව ගත කිරීමෙන් අනතුරුව මෙසේ යළි සියරට පැමිණීමට තීරණය කළ බවයි, ඔහු බීබීසී සංදේශයට කියා සිටියේ.

පසුගිය පාලන සමයේ මාධ්‍යවේදීන්ට කළ අතවර සම්බන්ධයෙන් විශේෂ පරීක්ෂණයක අවශ්‍යතාවය අවධාරණය කරන සුනන්ද දේශප්‍රිය, ඒ සඳහා ආණ්ඩුවට බලපෑම් කිරීම තමන් ඇතුළු ක්‍රියාධරයන්ගේ වගකීම බව ද සඳහන් කළේය.

යුද අපරාධ චෝදනා

"සාක්ෂි තියෙන ඝාතන තියෙනව. ඉතින් ඒ ගැන පරීක්ෂණ පැවැත්වීම අත්‍යවශ්‍යයි. ඒ මගින් තමයි විදේශගත මාධ්‍යවේදීන්ට සහතිකයක් දෙන්න පුළුවන්," යනුවෙන්ද ඔහු කියා සිටියේය.

Image caption මාධ්‍යවේදීන් ඝාතනය කිරීම ඇතුළු සියලු සිදුවීම් සම්බන්ධයෙන් පරීක්ෂණ පවත්වන බව නව රජය පවසයි

සිය රට පැමිණෙන නමුත් යුද අපරාධ චෝදනාවලට වගකියුත්තන් සොයා දඬුවම් කිරීම ඇතුළු කරුණු සම්බන්ධයෙන් තමන් ගෙන ගිය උද්ඝෝෂණය නොනවත්වන බවයි සුනන්ද දේශප්‍රිය ප්‍රකාශ කරන්නේ.

කෙසේ නමුත් නව ආණ්ඩුව පත්වීමත් සමඟ යුද අපරාධ චෝදනා ඇතුළු ශ්‍රී ලංකාවට එරෙහි මානව හිමිකම් උල්ලංඝන චෝදනා සම්බන්ධයෙන් ජිනීවා මානව හිමිකම් මණ්ඩලය වඩාත් නම්‍යශීලී ප්‍රතිපත්තියක් අනුගමනය කරනු ඇතැයි යන්න ඔහුගේ විශ්වාසයයි.

"දේශීය වශයෙන් සහයෝගයක් නැතුව තනිකරම අන්තර්ජාතික වශයෙන් මනුෂ්‍යත්වයට එරෙහි අපරාධයන්ට දඬුවම් කිරීම සාර්ථක වෙලා නැහැ. මට ආරංචි විදියට මානව හිමිකම කවුන්සිලයේත් බහුතරයක් එවැනි අදහසක ඉන්නවා," යනුවෙන්ද ඔහු කියා සිටියේය.

'මහින්ද වෙනුවට මෛත්‍රී'

"මම හිතන්නේ මේ මාර්තු මාසෙදි අපිට වෙනස් ආකල්පයක් දැකගන්න ලැබේවි."

රජයේ මාධ්‍ය සම්බන්ධයෙන් වත්මන් රජය මෙතෙක් අනුගමනය කළ පිළිවෙත පිළිගත නොහැකි බව පවසන සුනන්ද දේශප්‍රිය ගතව ගිය සතියක කාලයක් ඇතුලත සිදු වී තිබෙන්නේ මහින්ද රාජපක්ෂ හිටපු ජනාධිපතිවරයාගේ රුව වෙනුවට මෛත්‍රීපාල සිරිසේන ජනාධිපතිවරයාගේ ආදේශ වීමක් පමණක් බව වැඩිදුරටත් කියා සිටියේය.