ජගත් කුසලානය: බංග්ලාදේශ තරඟය 'තීරණාත්මකයි'

Image copyright Getty

ජගත් කුසලානයේ දෙවැනි වටයට සුදුසුකම් ලැබීම පිණිස ශ්‍රී ලංකා කණ්ඩායමේ බංග්ලාදේශයට එරෙහි මීළඟ තරඟය තීරණාත්මක බව ක්‍රීඩා වාර්තාකරුවෝ පවසති.

ඩේලි මිරර් පුවත්පතේ ක්‍රීඩා කර්තෘ චන්නක ද සිල්වා ඒ බව කියා සිටියේ නවසීලන්තයේ ඩනීඩන් නගරයේ සිට බීබීසී සංදේශය සමඟ සාකච්ඡාවකට එක්වෙමින්.

Image copyright Getty

නවසීලන්තය සහ ඕස්ට්‍රේලියාවේ සම සත්කාරකත්වයෙන් පැවැත්වෙන ලෝක කුසලානයේදී මුහුණ දුන් මුල් වටයේ දෙවැනි තරඟයේදී ශ්‍රී ලංකාව ඇෆ්ඝනිස්තානය පරදවා ලබාගත්තේ ඉතා අසීරු ජයග්‍රහණයක්.

මීට දින කිහිපයකට ඉහතදී බටහිර ඉන්දීය කොදෙවුවන් අයර්ලන්තයට පරාජය වූ අන්දමින් ශ්‍රී ලංකාවද ඇෆ්ඝනිස්තානයට පරාජය වීමේ තර්ජනයකට තරඟය ආරම්භයේදී මුහුණ දුන්නේය.

“මම හිතන්නේ ඇෆ්ඝනිස්තානය ඉතා හොඳින් ක්‍රීඩා කළා විතරක් නෙවෙයි, ශ්‍රී ලංකාවත් ඔප්පු කළා ලෝකේ ඉහලම මට්ටමේ ක්‍රීඩා විලාශයක් ඔවුන් තවමත් පෙන්නුම් කරන්නේ නැති බව,” චන්නක ද සිල්වා පැවසීය.

Image copyright Getty

මේ මොහොතේ ශ්‍රී ලංකා කණ්ඩායම දක්වන දස්කම් සලකා බැලීමේදී ශ්‍රී ලංකා කණ්ඩායම අර්ධ අවසාන වටය දක්වා පමණක් සුදුසුකම් ලබනු ඇතැයි යන්න සිය මතය බවද ඔහු සඳහන් කළේය.

ශ්‍රී ලංකාව සමඟ තරඟයෙන් පරාජය වීමෙන් පසුවත් ඇෆ්ඝනිස්තානය තවමත් ඒ කාණ්ඩයේ එංගලන්තය සහ ස්කොට්ලන්තයට ඉදිරියෙන් සිටියි.