මන්ත්‍රී නාමල්ට 'හමුදා සෙබලෙක් යොදාගන්න බෑ'

Image caption "හමුදා කෝප්‍රල්වරයෙක් එලෙස පෞද්ගලික රාජකාරියට යොදාගන්න බෑ හමුදාවෙන් ඔහුව මුදවා හැරියේ නැත්නම්"

හමුදාවේ කෝප්‍රල්වරයකු පෞද්ගලික ආරක්ෂකයකු ලෙසින් සේවයේ යොදවා ගැනීමට නාමල් රාජපක්ෂ මන්ත්‍රීවරයාට බලයක් නැති බව පොලිසිය පවසයි.

පොලිස් ප්‍රකාශක සහකාර පොලිස් අධිකාරී රුවන් ගුණසේකර ඒ බව කියා සිටියේ, පසුගිය සතියේ ජනාධිපති මෛත්‍රීපාල සිරිසේන සහභාගි වූ රැස්වීමකට යුද හමුදා කමාන්ඩෝ බලකායේ කෝප්‍රල්වරයකු ගිනි අවියක් රැගෙන පැමිණීම පිළිබඳව අදහස් දක්වමින්.

"හමුදා කෝප්‍රල්වරයෙක් එලෙස පෞද්ගලික රාජකාරියට යොදාගන්න බෑ හමුදාවෙන් ඔහුව මුදවා හැරියේ නැත්නම්," ඔහු පැවසීය.

අඟුණකොලපැලැස්සේ පැවති ශ්‍රී ලංකා නිදහස් පක්ෂයේ දිස්ත්‍රික් රැස්වීමට එම කෝප්‍රල්වරයා පැමිණ තිබෙන්නේ නාමල් රාජපක්ෂ මන්ත්‍රීවරයාගේ ආරක්ෂක නිලධාරියකු ලෙසින් බව සනාථ වී ඇතැයි බීබීසී සංදේශයට කියා සිටි පොලිස් ප්‍රකාශකවරයා, හමුදා සේවයේ යෙදී සිටින සෙබළකු පෞද්ගලික ආරක්ෂකයකු ලෙස යොදා ගැනීමට කිසිවකුටත් බලයක් නැති බව පැවසීය.

ඔහු අත ගිනි අවියක් තිබූ බව ප්‍රතික්ෂේප කරන නාමල් රාජපක්ෂ මන්ත්‍රීවරයා දිවයින පුවත්පතට පවසා තිබුනේ, සිය ආරක්ෂක නිලධාරියා අත තිබුණේ වතුර බෝතලයක් බවයි.

එහෙත් ඔහු අත පිස්තෝලයක් තිබූ බව සනාථ කළ සහකාර පොලිස් අධිකාරී රුවන් ගුණසේකර, අදාළ කෝප්‍රල්වරයා හිටපු ජනාධිපති මහින්ද රාජපක්ෂ ගේ ආරක්ෂක කටයුතු වෙනුවෙන් අනුයුක්ත කරන ලද ආරක්ෂක නිලධාරියෙක් බව අනාවරණය වී ඇතැයි වැඩිදුරටත් සඳහන් කළේය.

පසුගිය සෙනසුරාදා අත්අඩංගුවට ගන්නා ලද එම කෝප්‍රල්වරයා දැනට රිමාන්ඩ් බන්ධනාගාරගත කොට තිබේ.

මේ පුවතට සම්බන්ධ තවත් විස්තර