ඔබේ දුරකථනයේ හෝ පරිගණකයේ මෙය වාදනය කිරීමට අදාළ මෘදුකාංග නැත

ලාංකීය තරුණියට බ්‍රිතාන්‍ය රැජින ගෙන් සම්මාන

පොදු රාජ්‍ය මණ්ඩලීය රටවල් සඳහා වූ තරුණ නායකත්ව වැඩසටහනෙන් දස්කම් දැක්වූ ශ්‍රී ලාංකිකයන් දෙදෙනෙක් පසුගියදා බ්‍රිතාන්‍ය රැජිනගෙන් සම්මාන ලබා ගත්හ.

ලන්ඩනයේදී එලෙස සම්මාන දිනා ගත්තේ කාවින්ද්‍යා තෙන්නකෝන් සහ තේජිත සෞභාග්‍ය එදිරිසිංහ යන ශ්‍රී ලාංකිකයන් දෙදෙනායි.

"රැජින විතරක් නෙවෙයි, තව මේ වගේ අපේ ක්ෂේත්‍රයේ වැඩ කරන, අපිට වඩා සේවයක් කරලා තියන අයවත් හම්බ වෙන්න පුළුවන් වුණා," ලන්ඩනයේ පිහිටි බීබීසී මූලස්ථානයට පැමිණි කාවින්ද්‍යා තෙන්නකෝන් පැවසුවාය.

සමාජ අරමුණක් සහිත ව්‍යාපාරයක් වශයෙන් තම මිතුරකු සමග එකතු වී පවත්වා ගෙන යන 'Without Borders' නමැති ආයතනය විසින් දැරණියගල සහ ඒ අවට ගම්මාන පහක අඩු ආදායම් පවුල් ඉලක්ක කොට ව්‍යාපෘති දියත් කර ඇති බවයි ඇය කියා සිටියේ.

"මම හිතන්නේ අපි ඒ කරන යන වැඩේ තියන වෙනස තමයි මේ සම්මානය අපට දිනා ගන්න මූලික වෙච්ච කාරණය," කාවින්ද්‍යා තෙන්නකෝන් වැඩිදුරටත් කියා සිටියාය.

තමන් වෙසෙන ජන කොට්ඨාශවල ජන ජිවිතයේ ගුණාත්මකභාවය ඉහළ නැංවීමට කළ මෙහෙය හේතුවෙන් පොදු රාජ්‍ය මණ්ඩලීය රටවල තරුණ තරුණියන් 60 දෙනකු මෙසේ සම්මාන ලැබීමට සුදුසුකම් ලබා තිබේ.

සිය බ්‍රිතාන්‍ය සංචාරයේදී ඔවුහු බ්‍රිතාන්‍ය අගමැති ඩේවිඩ් කැමරන් ද මුණ ගැසුනහ.