ගාන්ධි දිවියේ අවසන් දශකය

Image caption මහාරාෂ්ට්‍ර ප්‍රාන්තයේ සේවාග්‍රාම් ගම්මානයේ ඇති තම කාර්යාලයේ දී දුරකථන ඇමතුමක් ලබා ගන්නා ගාන්ධි තුමා (1938 දී)

මහත්මා ගාන්ධිගේ ජීවිතයේ අවසන් දස වසර තුළ ගන්නා ලද දුර්ලභ ඡායාරූප ඇතුළත් ග්‍රන්ථයක් ඉන්දියාවේ ප්‍රකාශයට පත් වී තිබේ.

ඡායාරූප ශිල්පියා මහත්මා ගාන්ධිගේ දෙවන පරපුරේ ඥාති පුත්‍රයෙකු වන කානු ගාන්ධි යි.

මේ මුනුබුරා මහත්මා ගාන්ධි ගේ සහායකයෙකු ලෙස එතුමා ආ ගිය හැම තැනකම පාහේ එකට සිටි අයෙක්.

ඔහු අත තිබූ කැමරාවේ සටහන් වූ මහත්මා ගාන්ධි ගේ සේයා රූ ගණන දෙදහසකට අධිකයි. මේ ඉන් කිහිපයක්.

ගාන්ධි තුමා ගේ සිරුරේ බර කිරන අවස්ථාවක් - 1945 දී මුම්බායි නුවර (එවකට බොම්බේ නුවර) බිර්ලා මන්දිරයේ දී.

සේවාග්‍රාම් ආශ්‍රමයේ තම කාර්යාලය ඉදිරිපිටදී - හිස මත කොට්ටයක් තබා ගෙන සිටින්නේ දැඩි හිරු රශ්මිය නිසයි. (1940 දී)

මහත්මා ගාන්ධි සිය බිරිඳ කස්තුර්බා සමඟ 1938 දී.

1939 දී ගුජරාට් ප්‍රාන්තයේ දී තුන් දින උපවාසයක යෙදී සිටින අවස්ථාවක්. ගාන්ධි තුමාගේ වැඩිමහල් සහෝදරිය සහ තවත් ඥාතියෙකු දෙපසින්.

සේවාග්‍රාම් හි කුල පීඩිත කාන්තාවක් සහ ක්‍රිස්තියානි පුරුෂයෙකු විවාහ වන මොහොතේ ඊට සහභාගී වන ගාන්ධි යුවළ. (1940)

ගාන්ධි තුමාගේ බිරිඳ මිය යාමට මාස කිහිපයකට පෙර රෝගාතුරව ඇඳේ වැතිර සිටින ආකාරය - 1944 දී පූනේ නගරයේ අගා ඛාන් මන්දිරයේ දී.

ඉන්දීය නිදහස් සටනේ වීරයෙකු ලෙස සැලකෙන සුභාෂ් චන්ද්‍ර බෝස් සමඟ 1938 දී. පසෙකින් සිටින්නේ ගාන්ධි තුමාගේ බිරිඳ කස්තුර්බා.

මහා පුරුෂයන් දෙදෙනෙකු භාවනාව හදාරමින්. මහා කවි රබීන්ද්‍රනාත් තාගෝර් සමඟ බටහිර බෙංගාලයේ ශාන්ති නිකේතනයේ දී. (1940)

කුල පීඩිතයන් වෙනුවෙන් ඇරඹුණු අරමුදලකට මුදල් එකතු කිරීම සඳහා දුම්රිය ගමනක යෙදෙමින්. බෙංගාලය, අසාමය සහ දකුණු ඉන්දියාව දක්වා ගිය මෙම දුම්රිය ගමන නිමා කිරීමට තුන් මසක් ගත විය. (1945-46)

1944 පෙබරවාරියේ දී අවසන් ගමන් ගිය සිය බිරිඳ කස්තුර්බා ගේ දේහය දෙස බලා සිටින ගාන්ධි තුමා. ඇගේ දේහය අසල නිදි වරමින් පැය ගණන් යාඥා කළ බව මහත්මා ගාන්ධි ගේ ජීවිත කතාවේ සඳහන්.

‘හැට වසරක් මා සමඟ එකට සිටි ඇය නොමැති ජීවිතයක් ගැන මට හිතා ගන්නවත් බැහැ’ සිය බිරිඳ මිය ගිය දා රාත්‍රියේ මහත්මා ගාන්ධි පවසා ඇත.

අවසන් දස වසර පුරා කැමරාවත් අතැතිව ගාන්ධි ගේ සෙවණැල්ල මෙන් සිටි කානු ගාන්ධි මුනුබුරා, 1948 දී මහත්මා ගාන්ධි මිය යන මොහොතේ ඔහු ළඟ නොසිටීම දෛවෝපගත සිදු වීමකි.

කානු ගාන්ධි 1986 දී හෘදයාබාධයකින් මිය ගියේ උතුරු ඉන්දියාවේ වන්දනා ගමනක යෙදී සිටියදී.

(Photographs by Kanu Gandhi/© Gita Mehta, heir of Abha and Kanu Gandhi.)