බංග්ලාදේශයට සුළි සුළඟක්;ලක්ෂ ගණනක් ජනතාව දුෂ්කර අඩියක

Image copyright AFP/GETTY
Image caption ලක්ෂ ගණනක් ජනතාව ආරක්‍ෂිත ස්ථාන කරා යවනු ලැබ ඇත.

ශ්‍රී ලංකාව ගංවතුර සහ නායයාම් නිසා මහා විපතකට පත්ව සිටියදී බංග්ලාදේශයේ මුහුදුබඩ කලාපවල ජනතාව ධාරානිපාත වර්ෂාවත් සමඟ එල්ල වූ සුළි සුළඟකට මුහුණ දී සිටිති.

මෝරා (Mora) යනුවෙන් නම් කරනු ලැබ ඇති එම සුළි සුළඟ නිසා මේවනවිට ලක්ෂ සංඛ්‍යාත ජනකායක් ආරක්‍ෂිත ස්ථාන කරා යොමු කරනු ලැබ ඇත.

පැයට කිලෝමීටර් 117 ක වේගයකින් හමාගොස් ඇති සුළි සුළඟ අද අඟහරුවාදා (මැයි 30) මුලින්ම එල්ල වී ඇත්තේ කොක්ස් බෂාර් (Cox's Bazar)ධීවර වරාය සහ චිතගොං නගරය අතර කලාපයකටයි.

Image caption සුළි සුළඟ මුලින්ම එල්ල වූ කලාපය -කොක්ස් බෂාර් (Cox's Bazar)ධීවර වරාය සහ චිතගොං නගරය අතර

මුහුදු තීරයේ පහත්බිම් ප්‍රදේශයන්හි මීටර් දෙකක් තරම් උස ජල ගැල්මක් වාර්තා වූ බව බංග්ලාදේශ් නිලධාරීහු පවසති.

කොක්ස් බෂාර් ප්‍රධාන වශයෙන් රෝහින්ග්‍යා මුස්ලිම් ප්‍රජාව වාසය කරන කලාපයකි.

රෝහින්ග්‍යා ප්‍රජා නායකයෙක් අදහස් දක්වමින් තම ජනයා ජීවත් වූ පැල්පත් රාශියක් විනාශ වූ බව කියා සිටියේය.

විසිදහසක් පමණ වාසස්ථාන විනාශ වූ බව ඔහු AFP මාධ්‍ය ජාලයට ප්‍රකාශ කර ඇත.

Image copyright EPA
Image caption ඩකා අගනුවරත් පවතින්නේ වැහිබර කාල ගුණයකි.

මුහුදු යාමෙන් වළකින ලෙස බංග්ලාදේශ් බලධාරීන් ධීවර ප්‍රජාවට උපදෙස් දී ඇත.

මෙම සුළි සුළඟ ඉන්දියාවට සහ මියන්මාරයටත් පහර දෙනු ඇතැයි අනාවැකි පළ කරනු ලැබ ඇත.