මෙහෙකරුවන්ට අමානුෂිකවූ අරාබි රජ කුමරියන්ට දඬුවම්

Image copyright AFP
Image caption මෙම නඩු විභාගය නිම වීමට වසර දහයකට ආසන්න කාලයක් ගතවිය

තම මෙහෙකරුවන්ට පහත් ආකාරයට සැලකීම සහ මිනිස් ජාවාරම සිදු කළ බවට එල්ල වූ චෝදනාවලට වරදකාරියන් වූ එක්සත් අරාබි එමීර් රාජ්‍යයේ, රාජ කුමාරිකාවන් අට දෙනෙකූට දඬුවම් නියම වෙයි.

මෙම කුමාරිකාවන්ට පහළොස් මසක අත්හිටවූ සිර දඬුවමක් සහ දඩ මුදල් නියම වූයේ බ්‍රසල්ස් නුවර අධිකරණයක පැවති නඩු විභාගයකින් අනතුරුව ය.

ඒ අනුව එක් රාජ කුමාරිකාවක ඩොලර් 185,000ක දඩයක් ගෙවිය යුතු අතර එම දඩ මුදලින් අඩක් අත්හිටවූ දඩයක් ලෙස නියම විය.

වසර 2008දී සිදුකළ සංචාරයක දී මෙම කුමාරිකාවන් විසින් මෙහෙකරුවන් විසි දෙනෙකු රැගෙන ගොස් ඇති අතර ඔවුන්ට ලැබී ඇත්තේ වහලුන්ට සම සැලකුම් ය.

නමුත් මෙම මෙහෙකරුවන්ට ඉතා අමානුෂික ලෙස සලකු බවට එල්ලවූ බරපතළ චෝදනා කිහිපයකින් ම මෙම කුමාරිකාවන් නිදහස් කර තිබේ.

එල්ලවූ සියලුම චෝදනා රාජ කුමාරිකාවන් අටදෙනා විසින් ප්‍රතික්‍ෂේප කරනු ලැබ ඇත.

Image copyright Getty Images
Image caption රාජ කුමාරිකාවන් අටදෙනා එක්සත් අරාබි එමීර් රාජ්‍යයේ ජනාධිපති ෂෙයික් ඛලීෆා බින් සයීඩ් ගේ ඥාතියෝ වෙති

ඔවුනට නියම වී ඇති දඩ මුදල් ගෙවන්නේද නැතහොත් ඊට එරෙහිව අභියාචනයක් ඉදිරිපත් කරන්නේද යන වග තවමත් තීරණය කර නොමැති බව අරාබි කුමාරිකාවන් වෙනුවෙන් පෙනී සිටි නීතිවේදියා කියා සිටියේය.

මෙම නඩු විභාගය සඳහා එක්සත් අරාබි එමීරයේ රාජ කුමාරිය සහ ඇයගේ දූකුමරියන් හත්දෙනා පෙනී සිට නැත.

කෑමට ඉතිරි වූ යමක්

මෙම කුමාරියන් අට දෙනා නවාතැන් ගෙන සිටි සුඛෝපභෝගී හෝටලයෙන් එක් මෙහෙකාරියක් පැන යාමෙන් අනතුරුව මේ පිළිබඳව මාධ්‍යයට හෙළි විය.

දවසේ පැය 24 පුරාම සේවයේ නිරත විය යුතු බවට නියෝග ලැබ සිටි මෙම මෙහෙකරුවන්ට නිදා ගැනීමට ඇඳක් ලැබී නැත.

එකදු නිවාඩු දිනයක් හෝ නොලද මොවුන්ට කෑමට ලැබී ඇත්තේ කුමාරිකාවන් අනුභව කොට ඉතිරි වූ යමක් පමණි.

මෙම නඩු විභාගය නිම වීමට වසර දහයකට ආසන්න කාලයක් ගතවිය.