පාකිස්තානයේ අගමැති ධුරය සඳහා නම් කල ඇමතිට වරෙන්තුවක්

Makdum shahbudin

පාකිස්තානයේ අගමැති ධුරය සඳහා නම් කල මක්දූම් ෂහබුදින් අත්අඩංගුවට ගන්නා ලෙසට වරෙන්තුවක් නිකුත් කිරීමට එරට විනිසුරුවරයෙක් පියවර ගෙන තිබේ.

විනිසුරුවරයා මෙම වරෙන්තුව නිකුත් කර ඇත්තේ මක්දූම් ෂහබුදින් අගමැතිධුරයට පත්කර ගැනීම සඳහා පාකිස්තානු පාර්ලිමේන්තුව ලබන සිකුරාදා ජන්ද විමසීමට නියමිතව තිබියදී.

සෞඛ්‍ය අමාත්‍ය ධුරය දැරූ සමයේ දී නීති විරෝධී බෙහෙත් ආනයන කළ බවට මක්දූම් ෂහබුදින් ට චෝදනා එල්ල වී ඇත.

පාකිස්තානු ජනතා පක්ෂයේ ජ්‍යෙෂ්ඨ සාමාජිකයෙක් වන ඔහුගේ නම අගමැති ධුරය සඳහා නම් කරන ලද්දේ යුසුෆ් රාසා ජිලානි අගමැති ධුරය සඳහා නුසුදුස්සෙක් බව පාකිස්තාන ශ්‍රේෂ්ඨාධිකරණය තීන්දු කිරීමෙන් අනතරුවයි.

ෂහබුදින්ට එරෙහිව වරෙන්තු නිකුත් කිරීම පාකිස්තානු අධිකරණය සහ ආණ්ඩුව අතර දිගු කලක සිට පවතින ගැටුමේ නවතම පියවර යැයි විචාරකයෝ පවසති.