ඔබේ දුරකථනයේ හෝ පරිගණකයේ මෙය වාදනය කිරීමට අදාළ මෘදුකාංග නැත

'හින්දුන් පිළිබඳ අසම්මත ඉතිහාසයක්' පොත ඉවතට

ඇමරිකානු විද්වතකු විසින් හින්දු ආගම ගැන ලියන ලද පොතක පිටපත් වෙළෙඳ පොලින් ආපසු කැඳවීමටත් පිටපත් සියල්ල විනාශ කිරීමටත් පෙන්ගුයින් පොත් ප්‍රකාශන සමාගමේ ඉන්දීය ශාඛාව තීරණය කොට තිබේ.

ඉන්දීය නීතියට ගරු කිරීම සඳහා බැඳී සිටින හෙයින් මෙම පියවර ගත් බවයි පෙන්ගුයින් ප්‍රකාශන සමාගමේ ඉන්දීය ශාඛාව කියා සිටින්නේ.

තමන් හින්දු ආගමට පහර ගසා ඇති බවටත් හින්දු භක්තිකයන් කාමුකයන් ලෙස හඳුන්වා ඇති බවටත් අන්තර්ජාලයේ බ්ලොග් කරුවන් චෝදනා කර ඇති බවයි වෙන්ඩි ඩොනිගර් පවසන්නේ.

‘The Hindus: Alternative History’ යනුවෙන් ඉංග්‍රීසි බසින් රචිත ‘හින්දුන් පිළිබඳ අසම්මත ඉතිහාසයක්’ නමැති කෘතිය සම්පාදනය කොට ඇත්තේ වෙන්ඩි ඩොනිගර් විසින්.

හින්දු ආගම පිළිබඳව පොත් ගණනාවක් රචනා කොට ඇති චිකාගෝ විශ්ව විද්‍යාලයේ මහාචාර්යවරියක වන ඇය කාම සූත්‍රය ද ඉංග්‍රීසි බසට පරිවර්තනය කොට ඇත.

අකුණු පහරක්

දෙදහස් නවය වසරේ දී ඇය රචනා කළ ‘හින්දුන් පිළිබඳ අසම්මත ඉතිහාසයක්’ නමැති කෘතිය හින්දු බැතිමතුන් කෝපාවිෂ්ට වන තරමේ අකුණු පහරක් වූයේ කෙසේ දැයි ඇය ප්‍රශ්න කරයි.

තමන් හින්දු ආගමට පහර ගසා, හින්දුන් කාමුකයන් බවට පත් කොට ඇති බවට චෝදනා කරමින් බ්ලොග් කරුවන් තම පොත ගැන විවේචන එල්ල කොට ඇති බවයි ඇය පවසන්නේ.

එසේම තමන්ට අශෝභන සහ තර්ජනාත්මක විද්‍යුත් තැපැල් පණිවිඩ එවා ඇති බවත් ඇය බීබීසි යට පැවසුවාය.

ප්‍රබන්ධ නොවන කාණ්ඩයේ, වැඩියෙන්ම අලෙවිවන පොත ලෙස ජනප්‍රියත්වයට පත් වෙමින් තිබිය දී එය තහනම් කරන ලෙස ඉල්ලා දිල්ලි නුවර පිහිටි ඇමරිකානු තානාපති කාර්යාලය ඉදිරිපිට උද්ඝෝෂණයක් පවා පැවැත්විණ.

සිය කෘතියේ පිටපත් විනාශ කිරීමට තීරණය කොට තිබීම ගැන දක්වන ප්‍රතිචාරය කුමක් දැයි වෙන්ඩි ඩොනිගර් කතුවරිය ගෙන් විමසීමක් කළ විට ඇය පැවසුවේ එම තොරතුර සතියකට පෙරදී තමන්ට අසන්නට ලැබුණ බවයි.

“මම ඒ ගැන කනගාටුවට පත් වෙනවා. මගේ සිතේ මේ ගැන සැකයක් තිබුනා. මේ නඩුව අවුරුදු හතරක් තිස්සේ ඇහුවා. මම ඉතින් තීරණය කළා එයින් අපි පරාද වෙයි කියල. මම මගේ වැඩ කටයුතු කර ගෙන යමින් වෙනත් පොතක් ලියමින් සිටියා. නමුත් හදිසියේ ම ඉන්දියාවේ සහ ලෝකයේ මගේ පොතට පල වුනු විරෝධතාවෙන් මම පුදුමයට පත්වුනා.” කතුවරිය ප්‍රකාශ කළාය.

අභියෝගය

එම පොත අභියෝගයට ලක් කරමින් හින්දු කණ්ඩායමක් විසින් නඩු පවරා තිබුණු අතර අපරාධ නීතිය යටතේ වෙනම චෝදනා දෙකක් ද ගොනු කොට තිබුණි.

නමුත් පොත ප්‍රකාශයට පත් කළ පෙන්ගුයින් සමාගම එම හින්දු කණ්ඩායම වන ශික්ශා බචාවෝ ආන්දෝලන් නමින් හැඳින්වෙන අධ්‍යාපනය රැක ගැනීම සඳහා වූ සංවිධානය සමඟ අධිකරණයෙන් පිටත දී ප්‍රශ්නය සමතයකට පත් කර ගැනීමට එකඟත්වයක් ඇති කොට ගෙන තිබේ.

තමන් පෙන්ගුයින් සමාගම කෙරෙහි හෝ සමහරකු පවසන ආකාරයට ඉන්දීය නීතිය ගැන කෝපයට පත්ව සිටින්නේ දැයි යන ප්‍රශ්නයට පිළිතුරු දුන් ඇය කියා සිටියේ පෙන්ගුයින් සමාගම ගත හැකි සෑම ක්‍රියා මාර්ගයක්ම ගත් බවයි.

“ නීතිය ඉතාමත්ම කුරිරු එකක්. හින්දු ජනතාවට අපහාස වන පොතක් පල කළයි කියල නීතිය මගින් පොත් ප්‍රකාශකයා අපරාධකරුවකු කිරීමට උත්සහ දැරුවා. ඉතින් මේ නිසා නීතිය වෙනස් කළ යුතුයි. හැම පොත් ප්‍රකාශකයකු ම මේ නීතියට යටත්. හුඟක් අය කරන්නේ ප්‍රශ්නයක් මතුවුනු ගමන් පොත පල කිරීම අත් හරින එක. නමුත් පෙන්ගුයින් සමාගම හැකි තාක් දුරට ඊට විරුද්ධව සටන් කරපු එක අගය කළ යුතුයි.” ඇය සඳහන් කළාය.

මෙම කෘතියට එරෙහි උද්ඝෝෂණ පිටුපස සිටින්නේ විශ්‍රාමික ගුරුවරයකු සහ විදුහල්පතිවරයකු ද වූ, ශික්ෂා බචාවෝ ආන්දෝලන් සංවිධානයේ නායක දිනානාත් භත්රා යි.

විකෘති ප්‍රකාශ

විශ්‍රාම යාමෙන් පසු ඔහු පුවත් පතකට ප්‍රකාශ කළේ පාසල් සිසුන්ට අධ්‍යාපනය ලබා දෙන ග්‍රන්ථ වල පල වන විකෘති ප්‍රකාශ ඉවත් කිරීම පිණිස තම කාලය වැය කරන බවයි.

තම පොත විවේචනය කරන්නන් සහ මිථ්‍යාදෘෂ්ටිකයන්ට දෙන පණිවිඩය කුමක් දැයි විමසූ විට ඇය පැවසුවේ තම පොතෙන් සියලුම හින්දුන්ට අපහාසයක් සිදු වී නැති බවයි.

“බොහෝ දෙනෙක් මට ලියල පැසසුමට ලක් කළා. පොත හොඳින් අලෙවි වන බවත් ඔවුන් මට ලියල තියෙනවා. ඇත්තටම මේ පොත හින්දුන්ට එරෙහි එකක් නොවෙයි. එක්තරා විදිහක හින්දුන්ට එයින් අපහාසයක් සිදු වෙනවා - මූලධර්මවාදී හින්දුන්ට. ඔවුන්ට තමයි පොත අවලංගු කරන්න ඕනෑ වුනේ. පොතක් ගැන නිතරම මත පලවෙනවා. සමහරුන් ඒකට කැමති නැහැ. ඒකට කමක් නැහැ. සමහරෙක් කැමතියි. ඒක ගැඹුරු පොතක්. ඒක කියවන්න දෙන්න ඕනෑ. කැමති අය කියවයි කැමති නැති අයට නොකියව ඉන්න පුළුවන්.” ඇය ප්‍රකාශ කළාය.

තම පොතෙන් ලිංගිකත්වය සහ රාගය ඇතිවන කරුණු අඩන්ගුවන්නේද යන ප්‍රශ්නයත් යොමු කරන ලදී.

කතුවරිය පැවසුවේ පිටු 800 වන තම පොතේ ඒ ගැන සඳහන් වන්නේ අල්පමාත්‍ර වශයෙන් බවයි. එය හින්දු ඉතිහාසය පිළිබඳ ගැඹුරු පොතක් බවත් ලිංගික කරුණු කිසිසේත්ම අඩංගු නොවන බවයි ඇය පැවසුවේ.

“මෙය සම්පූර්ණයෙන්ම පිස්සුවක්” කතුවරිය කියා සිටියාය.