ඔබේ දුරකථනයේ හෝ පරිගණකයේ මෙය වාදනය කිරීමට අදාළ මෘදුකාංග නැත

‘පිලයි’යානයෙන් තවත් තොරතුරු

ඊයේ, බදාදා( 12) වල්ගා තරුවක් මතට සාර්ථකව සේන්දු කරවනු ලැබුණ ‘පිලයි’(Philae) උප යානයෙන් තවත් තොරතුරු ලැබෙමින් ඇතැයි යුරෝපා අභ්‍යවකාශ මධ්‍යස්ථානයේ විද්‍යාඥයෝ පවසති.

එම තොරතුරු අනුව සිය යානය එක්තරා සුරක්ෂිත තත්වයක මේ වන විට පවතින බවයි, කුතූහලයෙන් පසු වෙන විද්‍යාඥයන් පවසන්නේ.

යුරෝපා අභ්‍යවකාශ මධ්‍යස්ථානය විසින් වල්ගා තරුව කරා යැවූ ‘රොසෙටා’ අභ්‍යවාකාශ යානයට සිය ඉලක්කය කරා ලඟා වීමට වසර දහයකට අධික කාලයක් ගත විය.

‘රොසෙටා’ යානයට අනුබද්ධ කොට යැවූ ‘පිලයි’උප යානය මව් යානයෙන් වෙන් කරනු ලැබීමෙන් අනතුරුව එය සාර්ථකව වල්ගා තරුව මත තැන්පත් විය.

යුරෝපා අභ්‍යවකාශ මධ්‍යස්ථානය විසින් නිකුත් කරන ලද අලුත්ම නිවේදන මගින් පැවසෙන්නේ, සිය යානයේ තත්වය තහවුරු කිරීමට උදව් වෙන පින්තූර ලැබෙමින් පවතින බවයි.

යානයේ ආරක්ෂාව

‘පිලයි’යානය වල්ගා තරුව මත නැංගූරම් දමා නොමැති අතර යානය සුරක්ෂිතව තබා ගැනීම සඳහා ඊට අනුබද්ධ ‘මණ්ඩා’ උපකරණ (harpoons) මුදා හැරිය යුතුද නැද්ද යන්න තීන්දු කිරීම ගැන විද්‍යාඥයන් සලකා බලමින් සිටින බවත් යුරෝපා අභ්‍යවකාශ මධ්‍යස්ථානය පවසයි.

එවැනි පියවරක් ගනු ලැබීම යානය ආපස්සට විසි වීමට හේතු වේද යන්න විද්‍යාඥයන්ගේ සැකයයි.

මෙය වල්ගා තරුවක් මත අභ්‍යවකාශ යානයක් ගොඩ බස්වනු ලැබුණ පළමු අවස්ථාවයි.

එම වල්ගා තරුව පෘතුවියේ සිට කිලෝමීටර මිලියන පන්සීයක් දුරින් පිහිටා ඇති බවයි තක්සේරු කෙරෙන්නේ.