ශ්‍රී ලංකාවත් බ්‍රිතාන්‍ය බලහත්කාර විවාහ ලැයිස්තුවේ

forced marriage

බ්‍රිතාන්‍යය තුළ බලහත්කාරයෙන් විවාහ කරවන රටවල් අතුරින් ශ්‍රී ලංකාව හය වෙනි වෙනි ස්ථානයට පත්ව තිබෙන බව සමීක්ෂණයකින් හෙළිදරව් වී ඇත. බ්‍රිතාන්‍ය නීතිය යටතේ බලහත්කාර විවාහ කිරීම නීතියෙන් වරදක් කොට ඇති අතර ඒ පිළිබඳව කටයුතු කරන ඒකකයක් පිහිටුවා ඇත.

වාර්තා වූ සිදුවීම් වලින් සියයට එකක් වාර්තා වී ඇත්තේ ශ්‍රී ලාංකික සම්භවයක් ඇති පවුල් වලින් වන අතර ලැයිස්තුවේ හය වෙනි තැනට පත්ව ඇත්තේ ශ්‍රී ලංකාවයි.

බලහත්කාර විවාහ සිදුකළ බ්‍රිතාන්‍ය වාසි පවුල් පිළිබඳව පැවැත්වූ සමීක්ෂනය අනුව වැඩිම බලහත්කාර විවාහ වාර්තා වී ඇත්තේ පකිස්ථාන සම්භවයක් ඇති පවුල් වලින්. සිදුවීම් වලින් සියයට තිස් අටක්ම වාර්තා වී ඇත්තේ පකිස්තානු සම්භවයක් ඇති පවුල් වලින් වන අතර දෙවෙනි තැන ගන්නා ඉන්දියාවෙන් වාර්තා වූ ප්‍රතිශතය සියයට හතක් පමණ වේ.

ඉන්දියාව,බංග්ලාදේශය,ඇෆ්ගනිස්ථානය,සෝමාලියාව සහ තුර්කිය යන රටවල් වලින්ද බලහත්කාර විවාහ වාර්තා වී ඇත.

අපහරණය වලක්වා ලීම සඳහා වූ අමාත්‍ය කැරන් බ්‍රඩ්ලි කියා සිටියේ බලහත්කාර විවාහය අපරාධයක් සේ නීතිගත කිරීම තුළින් එහි බරපතලකම පිළිබඳව සමාජ වැටහීමක් ඇති කොට තිබෙන බවයි.. බලහත්කාර විවාහ සිදුකිරීම බ්‍රිතාන්‍ය නීතිය අනුව හත් අවුරුදු සිර දඬුවමක් ලැබිය හැකි වරදක්.