ග්‍රීසියට තවත් ණය පොදියක්

Image copyright PA

මූල්‍ය අර්බුදයෙන් ගොඩ ඒම සඳහා ග්‍රීසියට තුන් වැනි වතාවටත් ණය ලබා දීමට යුරෝපා නායකයෝ තීරණය කරති.

මේ සඳහා යුරෝපා නායකයන් අතර ඡන්ද විමසීම පැවැත් වුණේ රහස්‍ය මට්ටමින්.

මෙම ණය මුදල ලබා ගැනීම වෙනුවෙන් ජනතා සහන කප්පාදු කිරීමට ග්‍රීසිය එකඟ වී ඇත.

නව බදු පැනවීම, විශ්‍රාම වැටුප් කප්පාදු කිරීම, කම්කරු නීති වෙනස් කිරීම සහ ණය ආපසු ගෙවීම සඳහා වෙන් වුණු අරමුදලක් පිහිටුවීම මෙම ප්‍රතිසංස්කරණ අතර වෙයි.

Image copyright Reuters

එම එකඟතාව මත ඉදිරි වසර තුන ඇතුළත ඩොලර් බිලියන අනූ පහක ණය මුදලක් ග්‍රීසියට ලබා දීමට යුරෝපා නායකයෝ අනුමැතිය පළ කළහ.

මේ පිළිබඳව ග්‍රීක අගමැති ඇලෙක්සිස් ට්සීප්රාස් කියා සිටියේ ග්‍රීසිය අවසානය දක්වා හොඳ සටනක් කළ අතර ඉදිරියේ දී දුෂ්කර තීරණවලට මුහුණ දීමට සිදු වන බවයි.

යුරෝපා නායකයන් ඉල්ලා ඇති දේශපාලන ප්‍රතිසංස්කරණ ලබන බදාදා වන විට ග්‍රීක පාර්ලිමේන්තුවේ අනුමැතිය ලබා ගෙන නීති ගත කළ යුතු වෙයි.

Image copyright
Image caption ග්‍රීක අගමැති ඇලෙක්සිස් ට්සීප්රාස්

කෙසේ නමුත් ග්‍රීසියේ ප්‍රතිසංස්කරණ භාර ඇමතිවරයා පවසා ඇත්තේ යුරෝපයේ පටි තද කර ගැනීමේ යෝජනා ජයග්‍රහණය කර ඇති බවයි.

ඉතා දුෂ්ට කප්පාදු සිදු කිරීම හෝ ග්‍රීක ආර්ථිකයේ ක්‍ෂණික මරණය යන දෙකින් එකක් තෝරා ගැනීම සඳහා මෙම යෝජනාවලිය තුළින් ග්‍රීසියට බල කර ඇති බවයි ඔහු පවසන්නේ.