සහෝදරියන් දූෂණයට ලක් කිරීමට ගම්මු තීන්දු කළාද?

Image caption තරුණයාගේ එක් සහෝදරියක් නීතියේ සරණ පතන්නීය

කුලයෙන් ඉහළ යැයි සැලකෙන කාන්තාවක් සමග රහසින් පැන ගිය තරුණයකුට දඬුවම වශයෙන් ඔහුගේ සහෝදරියන් දෙදෙනා දූෂණය කළ යුතු යැයි තීන්දු කොට ඇති බවට ඉන්දියාවේ ගම්සභාවකට චෝදනා එල්ල වී තිබිණි.

ගම්සභාව විසින් ගනු ලැබ ඇතැයි පැවසෙන එම තීන්දුවට එරෙහිව ඇම්නෙස්ටි ජාත්‍යන්තරය ඉදිරිපත් කළ පෙත්සමකට ලක්ෂයකට වැඩි පිරිසක් අත්සන් තැබූහ.

මතභේදයට තුඩු දුන් තීන්දුවට එරෙහිව කටයුතු කරන ලෙස බ්‍රිතාන්‍ය පාර්ලිමේන්තු මන්ත්‍රීවරුන්ට ඉල්ලීම් ඉදිරිපත් විය.

බීබීසීයේ සංජේ මජුම්දර් උතුරු ඉන්දියාවේ පිහිටි බග්පත් ගම්මානය බලා ගියේ ඒ සම්බන්ධයෙන් සොයා බැලීම සඳහායි.

සංක්‍රවුද් ගම්මානය පිහිටා තිබෙන්නේ දිල්ලි අගනුවර සිට පැයක පමණ දුරකින්.

දූවිලි සහිත පටු මාර්ග තුළ එහෙමෙහෙ ඇවිද යන පිරිමි ගම්මුන් බහුලව දැකිය හැකි අතර මුහුණු ආවරණය කර ගත් කාන්තාවන් ඇතැම් විට සුළු වශයෙන් දැකිය හැකියි.

'අපකීර්තියක්'

තරුණියන් දෙදෙනා දූෂණයට ලක් කළ යුතු බවට ගම්සභාව විසින් ගනු ලැබ ඇතැයි පැවසෙන තීන්දුව හේතුවෙන් මේ ගම්මානයට අපකීර්තියක් අත් වූ බවයි ඇතැමෙකුගේ අදහස.

ගම්සභාව විසින් මෙවැනි තීන්දුවක් ගනු ලැබූ නැති බව ඔවුහු කියා සිටිති.

‘අපේ ගමේ ගැහැණුන්ට නින්දා සහගත ලෙස සලකන බවට ඊනියා වාර්තා පළ වීමත් සමග ඒ සම්බන්ධයෙන් බ්‍රිතාන්‍ය පාර්ලිමේන්තු මන්ත්‍රීවරුන් සැලකිල්ල යොමු කොට තිබෙනවා කියලා අපි පත්තරේ දැක්කා,’ වැඩිහිටි ගම්වැසියෙක් පැවසීය.

‘ මේ වාර්තා අමූලික බොර, සිදු නොවුන දෙයක් ගැන ප්‍රවෘත්ති පළ කිරීමෙන් අපේ ගමට ලැජ්ජාවක් වුණා,’ තරුණයෙක් කෝපයෙන් කෑ ගැසීය.

රහසේ පැන ගිය තරුණ යුවල මේ වන විට එකිනෙකාගෙන් වෙන් වී සිටිති.

මේ අතර තරුණයාගේ එක් සහෝදරියක් නීතියේ සරණ පතන්නීය.

පැන ගිය තරුණියගේ පවුලේ උදවිය සහ කුලයෙන් උසස් යැයි සැලකෙන ගම්මුන් තම පවුලට නින්දා කරමින් තර්ජන එල්ල කරන බව ඇය කියා සිටියාය.

ගම හැර ගොස් සිටින ඇය නැවතත් ගමට ඒමට බියෙන් පසුවෙයි.

'තර්ජන'

‘මගේ සහෝදරයා සහ මේ තරුණිය අතර ආදර සම්බන්ධයක් තිබුන බව මුළු ගමම දැන ගෙන හිටියා. නමුත් ඇයගේ පවුල ඊට අවසර දුන්නේ නැහැ. අපි ඔවුන්ට අගෞරවයක් කළා කියලා ඔවුන් කිව්වා. අපිටත් අගෞරවයක් කරනවා කියලා ඔවුන් කිව්වා,’ ඇය සිය නීති උපදේශකයාගේ කාර්යාලය තුළදී පැවසුවාය.

තරුණයා සමග පැන ගිය තරුණිය මේ වන විට ජීවත් වන්නේ සිය පවුල සමගයි.

ඇයගේ නිවස අසල විශාල පිරිසක් රැස් වී සිටිති.

කුතුහලය මෙන්ම ඇතැම් විට සහාය දක්වන බව පෙන්වීම සඳහා ඔවුන් මෙහි පැමිණියා විය හැක.

තරුණිය සමග කතා කිරීමට අවස්ථාවක් ලැබුනත් ඇයගේ වැඩිමහල් පිරිමි ඥාතීන් දෙදෙනෙක් ඒ අසලම සිටිති.

පළ වූ වාර්තා ඇය තරයේ ප්‍රතික්ෂේප කළාය.

‘මම ඔහුව දන්නෙම නැති තරම්. අසූ තරමේ මම ඔහුගේ නමවත් දන්නේ නැහැ. ඔහු මාව රවට්ටලා එක්ක ගියේ. මට රස්සාවක් හොයලා දෙන්නම් කිව්වා, මගේ කැමැත්තෙන් තොරව ඔහු මාව රඳවා ගත්තා,’ ඇය කියා සිටියාය.

ඇය අදහස් දැක්වීමට පෙර ඒ සම්බන්ධයෙන් පුහුණු වී ඇති බවක් පෙනෙන්න තිබේ.

මේ අතර හදිසි තත්වයක් ඇති වීම වැළැක්වීම සඳහා අතිරේක පොලිස් භටයන් ගම තුළ යොදවා සිටියි.

ඊට බොහෝ සෙයින් හේතු වී ඇත්තේ මේ සඳහා ජාත්‍යන්තරය තුළ ඇති වූ ප්‍රතිචාරයයි.

පොලිසිය ප්‍රකශ කොට සිටියේ මේ සිදුවීම වැරදි ලෙස අර්ථකථනය කොට ඇති බවයි.

සාක්ෂි?

Image caption 'තරුණියන් දෙදෙනාට එරෙහිව තීන්දුවක් සම්මත කර ඇති බවත් දැන ගන්න නැහැ'

‘මේ සම්බන්ධයෙන් ගම් සභා රැස්වීමක් පැවති බවට පරීක්ෂණවලින් අපට කිසිම නිගමනයකට එන්න බැරි උනා. තරුණියන් දෙදෙනාට එරෙහිව තීන්දුවක් සම්මත කර ඇති බවත් දැන ගන්න නැහැ,’ අතිරේක පොලිස් අධිකාරි විද්‍යාසාගර් මිස්රා පැවසීය.

සංක්‍රවුද් ගම්මානය තුළ විවිධ ප්‍රජාවන්ට අයත් නොයෙක් ජන කොට්ඨාශ ජීවත් වෙති.

ඉන්දියාවේ බොහෝ ගම්මානවල මෙන් ඔවුන් ජීවත් වන්නේ සමගියෙන්.

නමුත් ප්‍රජාවන් එකිනෙකා අතර පවතින සබඳතාවලට සමාජීය සම්මතයන් දැඩි ලෙස බලපානු ලැබේ.

මෙම සමාජීය සම්මතයන් කඩවීම අවසානයේ ගෞරවය පිළිබඳ ප්‍රශ්නයක් ලෙසින් මතු වේ.

ගම්සභාව විසින් මෙවැනි සාහසික තීන්දුවක් ලබා දුන් බව පෙනෙන්න තිබෙන සාක්ෂි සුළු වශයෙන් දැකිය හැකියි.

නමුත් සමාජීය සම්මතයන්වලින් ඔබ්බට යෑමට මෙහි කිසිවකුටත් අවශ්‍ය නැති බව හොදාකාරවම පෙනී යයි.