Tiro dad ah oo ku dhintay Itoobiya

Itoobiya Rabshado
Image caption Rabshadaha dhawaan ka dhacayay Itoobiya ayaa salka ku haya qorshe ay dowladdu shaacisay November-tii hore, kaasoo caasimadda Addis Ababa loogu ballaarinayo qeybo ka mid ah gobolka Oromiya.

Tiro dad ah ayaa ku dhintay dalka Itoobiya, ka dib isbuurasho ka dhalatay boolis kala eriyayay dad mudaharaad ka dhigayay goob lagu cibaadeysanayay.

Dowladda Itoobiya ayaa qirtay in dad ay ku dhinteen rabshad ka dhacday magaalada Bishoftu ee gobolka Oromiya.

Weriyayaal ayaa arkay meydad badan oo lagu daadiyay meel god ah, waxaana ilo wareedyo mucaaradka taabacsan ay sheegeen in dadka dhintay ay gaarayaan 50 qof.

Rabshadda ayaa la sheegay in ay bilaabatay ka dib markii ay dad mudaharaad samaynayay ay horjoogsadeen khudbado ay odayaal ka jeedinayeen goob lagu cibaadeysto.

Dadka mudaharaadka samaynayay ayaa gacmaheeda oo is-dhaafsan kor u taagayay, taasoo astaan u ah dibed baxyada ay dhawaan wadeen qowmiyadda Oromada.

Rabshadaha dhawaan ka dhacayay Itoobiya ayaa salka ku haya qorshe ay dowladdu shaacisay November-tii hore, kaasoo caasimadda Addis Ababa loogu ballaarinayo qeybo ka mid ah gobolka Oromiya.

Beeraleyda qowmiyadda Oromada ayaa ka cabsi qabay in tallaabadaasi ay ka barakicin doonto beerahooda.