Trump oo dhaliilay gaashaanbuurta NATO

Donald Trump Lahaanshaha sawirka AFP
Image caption Trump ayaa ugu baaqay NATO in ay xoogga saarto dagaalka ka dhanka ah argagixisada.

Madaxweynah Maraykanka, Donald Trump, ayaa dhaliilay waddamada ay ka wada tirsan yihiin gaashaanbuurta NATO, asagoo hogaamiyayaasha dalalkaasi ugu baaqay in ay kordhiyaan kharashaadka ay ku bixiyaan gaashaandhiggooda.

Trump ayaa tilmaamay in loo baahan yahay in dhammaan dalalka NATO ay kharashkaasi gaarsiiyay waxa uu ku tilmaamay heerka ugu yar, oo ah boqolkiiba laba wax-soo-saarka guud ee waddan kasta.

Khudbad uu ka jeediyay xarunta NATO ee Brussels, ayaa madaxweyne Trump waxa uu ka cawday in keliya shan ka mid ah dalalka NATO ay kharash gareeyaan misaaniyaddaasi.

Haseyeeshee tiro dalal ah ayaa ku gacan sayray qiimayntaasi uu sameeyay madaxweynaha Maraykanka.

Trump ayaa sidoo kale ugu baaqay NATO in ay xoogga saarto dagaalka ka dhanka ah argagixisada.

Kulanka madaxda dalalka ka tirsan NATO, ayaa lagu ansixiyay qorshe uu Maraykanka watay oo ah in la kordhiyo dowrka ay gaashaanbuurtaasi ku leedahay dagaalka ka dhanka ah ururka isku magacaabay dowladda Islaamka.