Tirada dadkii ku dhintay gurigii London ku gubtay oo 17 maraysa

Muuqaalka gurig gubtay Lahaanshaha sawirka PA
Image caption Muuqaalka gurig gubtay

Booliska ayaa sheegay in 17 qof ay ku dhinteen dhisme dheer oo dab qabsaday oo ku yaal galbeedka magaalada London, waxayna ka digeen in tirada dhimashada ay korodho.

Shaqaalaha dab demiska oo lagu wargeliyey masiibadan abaaro 12:54 habeenimo saacadda London Arbacadii, ayaa soo badbaadiyay 65 qof dhismaha dheer ee Grenfell Tower oo ku yaal woqooyiga Kensington.

Dad goob joog ahaa ayaa sheegay in dadku ku go'doomeen dhismaha dheer oo ay u qayshanayeen in caruurtooda loo soo gurmado oo la badbaadiyo.

Wasiirka booliska iyo dab demiska, Nick Hurd, ayaa sheegay in ay hada qorshaynayaan in ay baadhaan dhismeyaasha dhaadheer ee la mid ka ah kan gubtay.

Qalabkan aad haysato kuma ciyaari kartid maqalkan iyo muuqaalkan
Wiil Soomaali ah oo ka badbaaday dabka

Shaqaalaha caafimaadka ayaa sheegay in 68 qof oo dhaawacmay loo kala qaaday lix isbitaal oo ku yaal magaalada London, dadkaas oo ay ka mid yihiin 18 qof oo xaaladoodu ba'antahay.

Taliye xigeenka waaxda dab demiska London, Steve Apter, ayaa sheegay in "weli dab ka baxayo qolal ka mid ah dhismaha, kuwaas oo ah kuwa xaga sare ku yaal ee ay adag tahay in la gaadhaa, bal se dhismaha gabi ahaantiiba dadkii laga daad gureeyey".

Ra'isal wasaare Theresa May ayaa sheegtay in ay aad uga murugaysantahay in dad naftooda ku waayeen shilkan