Qorshaha Trump waa ha dumo caymiskii Obama

. Lahaanshaha sawirka EPA
Image caption .

Madaxweyne Donald Trump ayaa sheegay in siyaasadda cusub ee caymiska caafimaadka ee xisbiga Jamhuurigu tahay mid doonaysa inuu dumo caymiska caafimaadka ee haatan jiraa.

"Wax aan yeeli doono ma aha" ayuu Trump ku yidhi warfidiyeenka isagoo ka hadlayey qorshihii caymiska ee Obama, waxaanu intaa ku daray "waan idiin sheegayaaye ma aha wax ay Jamhuurigu yeeli doonaan".

Xildhibaannada xisbiga Jamhuuriga kaga jira Senate-ka ayaan isku wada raacin taageerada qorshahan cusub ee laga doodayey Isniintii waxaana intii hore uga soo horjeeday ku biiray laba xildhibaan oo kale.

Hogaamiyaha xildhibaanada xisbiga Dimuqraadiga ee Senate-ka, Chuck Schumer, ayaa yidhi Trump wuxu "dhayalsanayaa" hanaanka caymiska caafimaadka Maraykanka.

"Wuxuu si kas ah u doonayaa in uu wiiqo hannaanka caymiska caafimaadka dalkan waxaanu ku ciyaarayaa malaayiin qof oo Maraykan ah naftooda" ayuu hadalkiisa ku daray Schumer.

Dhanka kalena ra'yi ururin la sameeyey ayaa muujisay in hanaanka caymiska Obama Care ay dadka Maraykanku doonayaan waxaana ra'yi ururintaa sameeyey wargeyska Washington Post iyo Telefishanka ABC News Isniintii.

Waxaana lagu ogaaday in kala badh iyo dheeraad dadka Maraykanku ay Obama Care ka door bidayaan qorshahan cusub ee haatan ay waddo xukuumadda Trump.