Kuuriyada Woqooyi oo gantaalkii labaad tijaabisay bil gudaheed

Gantaal tijaabo Lahaanshaha sawirka KCNA

Mareykanka iyo Kuuriyada Koonfureed ayaa sheegaya in Kuuriyada Woqooyi ay markii labaad tijaabisay gantaal dheereeya oo ah kuwa isaga kala goosha qaaradaha.

Gantaalkaasi ayaa in kabadan 3000 oo kilomitir hawada ku jiray muddo 45 daqiiqo ah ka hor inta uusan ku hooban xeebta dalka Japan.

Balse Ruushka ayaan qiimeyntaasi ku raacsanayn Mareykanka iyo Kuuriyada Koonfureed, waxa uuna sheegayaa in gantaalkaasi uu ahaa mid heer dhexe ah.

Kal hore bishan ayaa Kuuriyada Woqooyi ayaa tijaabisay gantaalkeedi ugu horreeyay ee ah kuwa qaaradaha isaga goosha, arrintaa oo ka dhignayd horumar dhanka barnaamijka hubka ee Pyongyang.

Xukuumadda Pyongyang ayaa sii wadda tijaabada gantaaladeeda xitaa iyaga oo lagu sii dhuujinaya xayiraadaha Qaramada Midoobey iyo cambaareynta uga imaaneysa beesha caalamka.