Al-Shabaab oo muddo kooban haysatay Ceel waaq

Shabaab Lahaanshaha sawirka AFP
Image caption Dagaalyahannada Al-Shabaab

Dagaalyahanno ka tirsan Al-Shabaab ayaa muddo kooban gacanta ku hayay degmada Ceel waaq ee gobolka Gedo, ka dib markii ay xalay halkaa isaga baxeen ciidamada dowladda Soomaaliya ee ku sugnaa.

Xooggga Al-Shabaab ayaa markii dambe isaga baxay degmadaasi, waxaana hadda kusoo laabtay ciidamada dowladda.

Gudoomiyaha Ceel waaq, Ibraahim Guuleed Aadan, ayaa BBC u sheegay in dagaalyahannada Al-Shabaab ay burburiyeen saldhigga degmada, isla markaana ay dhaceen raashin iyo qalab yaalay xafiisyo ay leeyihiin hay'ado gargaarka ka shaqeeya.

Ma jirto cid ay waxyeelo ka soo gaartay qabsashada Al-Shabaab ee degmadaasi.

Dadka deegaanka ayaa BBC u sheegay in ka dib markii ay dagaalyahannada Al-Shabaab ka baxeen Ceel waaq la maqlayay duqeyn cirka ah oo la rumaysan yahay in diyaaradaha dagaalka ee Kenya ay la beegsadeen dagaalyahannadaasi.

Al-Shabaab ayaa Isniintii lasoo dhaafay weerar khasaaro badan dhaliyay ku qaaday ciidamada dowladda ee fadhigoodu yahay degmada Beled Xaawo ee gobolka Gedo.