Ergo ka socota labada Kuuriya iyo Mareeykanaka oo ku kulmaya finland

Trump iyo Kim Jong-un Lahaanshaha sawirka AFP
Image caption Trump iyo Kim Jong-un

Wakiillo ka kala socda waddamada kuuriyada woqooyi, Mareykanka iyo kuuriyada koonfureed ayaa lagu wadaa in maalmaha soo socda ay kulan ku yeeshaan dalka Findland.

Waxaa la rumeysan yahay in ergadani ay ka wada hadli doonaan kulan la qorsheynayo in uu dhex mari doono madaxweyne Trump iyo hoggaamiyaha kuuriyada Woqooyi Kim Jong-un.

Warka ku saabsan kulanka labadani hoggaamiye ayaa soo shaac baxay kaddib markii sarkaal sare oo ka tirsan kuuriyada woqooyi lagu arkay magaalada Beijing, isaga oo diyaarad u sii raacaya Helsinki, halkaasi oo la filayo in uu kula kulmo diblomaasiyiin Mareykan ah iyo khubaro dhanka amniga ah oo u dhashay Kuuriyada Koonfureed.

Wasiirka arrimaha dibadaa Findland ayaa wadahadalladaasi ku tilmaamay in ay qeyb ka yihiin xiriir aan rasmi ahayn oo u dhaxeeya labada Kuuriya iyo Mareykanka.

Madaxweynaha Maraykanka ayaa toddobaadkii hore aqbalay casuumaad ku saabsan in uu kulan fool ka fool ah la yeesho Kim, arrintaas ayaana layaab noqotay maadaama oo labada masuul ay aflagaado iyo hanjabaad is waydaarsanayeen muddo bilo ah.

Ma jiro war rasmi ah oo ka soo yeeray Kuuriyada Waqooyi tan iyo markii casuumaadaas la soo mariyay masuuliyiinta Kuuriyada Koonfureed ee fadhigoodu yahay Washington.

Mowduucyada la xiriira