Xaaskii Rogo oo 7 maalmood oo kale sii xirnaan doonto

Image caption Hania oo maxkamadda la soo taagay

Maxkmad ku taalla magaalada Mombasa ee dalka Kenya ayaa waxa ay amartay in muddoo todobo maalmood ah xabsiga lagu sii hayo Xaaskii Sheekh Aboud Rogo oo ahaa sheekh aan afkaartiisa la gabanin oo sanaddii 2012-kii la dilay.

Hania Saga Rogo ayaa lagu eedeeyay in ay qaaraan u aruurisay dadyow ku lug lahaa hawlo argagixiso.

Booliiska ayaa haweenaydan la xiriiriyey mid ka mid ah gabdhihii lagu dilay Mombasa kaddib weerarkii ay booliisku sheegeen in ay fashiliyeen ee lagu qaaday saldhiga booliska ee Mombasa.

Waxaa la sheegay in ay xiriir la samenaysay gabadhaasi, iyada oo adeegsanaysa telefoonkeeda gacanta oo ay hadda la wareegeen booliisku iyaga oo baaritaan ku haya.

Dacwad oogaha ayaa waxa uu waydiistay in la siiyo mudo laba todobaad ah si uu u soo kaamil yeelo baaritaannada, balse garsooraha maxkamadda ayaa codsigaasi ku gacan seyrtay waxa uuna sheegay in booliiska ay baaritaanadooda ku soo gabagabeen karaan muddo 7 maalmood ah.

Garsoorahu wuxuu sidoo kale amray in la ixtiraamo xuquuqda asaasiga ah ee ay leedahay haweenaydaasi.

Qareennada u doodayey ayaa ka cawaday in hawenaydaasi laga hor istaagay dadkii soo booqan lahaa.

Waxay sidoo kale u sheegeen maxkamadda in Hania ay qabto xanuun una baahantahay in ay hesho dawo.

Dacwadda ayaa dib loo dhagaysan doonaa 23-ka bisha septembar.