Madaxweynaha shirkadda Uber oo is casilay

  • 20 Maarso 2017
Iscasilaadda madaxweynaha shirkadda ayaa layaab ku noqotay masuuliyiinta sare ee shirkadda Lahaanshaha sawirka Reuters
Image caption Iscasilaadda madaxweynaha shirkadda ayaa layaab ku noqotay masuuliyiinta sare ee shirkadda

Madaxweynaha shirkadda tagaasida ee Uber, Jeff Jones ayaa shaqada ka tagaya ka dib markii uu xilkaas hayay muddo lix bilood ka yar.

Ilo ka tirsan shirkadda ayaa BBC-da u sheegay in is casilaaddani ay tahay "mid aan la aqbali karin".

Waxay sheegeen in Jones uu qoonsaday in shirkaddu ay qof cusub u qoranayso madaxa hawlgalada, dadka booskaas u tartamayana uusan ka mid ahayn.

Laakiin barta internetka ee Recode ee ka warranta arrimaha tiknoolajiyadda ayaa sheegtay in sababta uu Jones shaqada uga tagay ay tahay arrimaha shirkadda ku xeeran ee dumarka la xiriira iyo kuwa tacadiyada galmada ah.

War qoraal ah oo shirkadda ka soo baxay Axaddii ayaa lagu sheegay "in ay Jeff uga mahadnaqayso lixdii bilood ee uu la joogay, ayna wanaag u rajaynayso."

BBC-du waxay fahamsan tahay in is casilaaddiisu ay u dhaqan galayso si degdeg ah.